काठमाडौं (हाम्रो खेलकुद) – खुकुरी नेपाल सुपर लिग (एनएसएल) फुटबलमा आज (बिहीबार) एक खेलमा मात्रै प्रतिस्पर्धा हुँदा ललितपुर सिटी एफसीले धनगढी एफसीको सामना गर्दैछ ।

खेल त्रिपुरेश्वरस्थित दशरथ रंगशालामा साँझ ५:३० बजेपछि हुनेछ । दुई खेलमा जित निकाल्न नसकेको ललितपुर धनगढीलाई हराउँदै लिगमा पहिलो जित निकाल्ने लक्ष्यमा मैदानमा उत्रनेछ । ललितपुर पहिलो खेलमा काठमाडौं रेजर्ससँग १–० ले पराजित हुदा एफसी चितवनसँग १–१ गोलको बराबरीमा रोकिएको थियो । दुई खेलबाट १ अंक जोडेर पुछारमा रहेको ललितपुरलाई उपाधि होडमै फर्कन पनि जितको खाँचो छ ।

टोलीसँग मार्की खेलाडी तथा कप्तान अन्जन विष्ट, कमल श्रेष्ठ, प्रवेश दनुवार, मिक्चेन तामाङ, एरिक विष्ट, नविन लामा, विमल राना, सरोज योन्जन लामा, रन्जन विष्ट, निरोज बस्नेत, पाल्साङ लामा, गौरव बुढाथोकी र गोलरक्षक अर्पण कार्की रहँदा विदेशी खेलाडीको रुपमा नुर्लान नोभरुजोभ, भिलिम पोसिन्कोभिक र पिटर सेगुन रहेका छन् ।

श्रम स्वीकृति नमिलेका कारण पिटरले सुरुवाती दुई खेल गुमाएका थिए । सम्भवत उनले धनगढीविरुद्ध खेल्ने सम्भावना छ । हिडन ट्यालेन्टका रुपमा ललितपुरले डोना थापालाई पनि भित्राएको छ ।

यता, धनगढी ललितपुरलाई हराउँदै लिगको शीर्षस्थानमा उक्लने लक्ष्यमा हुनेछ । पहिलो खेलमा विराटनगरसँग ३–० ले पराजित धनगढीले दोस्रो खेलमा काठमाडौं रेजर्समाथि ३–० को जित निकालेको थियो । दुई खेलबाट ३ अंक जोडेर तेस्रो स्थानमा रहेको धनगढीले ललितपुरलाई हराउन सके बुटवल लुम्विनी र विराटनगर सिटी एफसीलाई पछि पार्नेछ ।

काठमाडौंविरुद्ध दुई गोल गरेका ओलावाले ओलाडिपो आफिज नै टोलीका लागि मुख्य हतियार हुनेछन् । उनीसँगै राष्ट्रिय टोलीका कप्तान किरण चेम्जोङ, विशाल राई, दिनेश राजवंशी, विवेक बस्नेत, अशोक खवास, निशान खड्का, टंक बस्नेत, पुजन उपरकोटी, दर्शन गुरुङ, युद्ध शाही पनि टोलीमा रहेका छन् । यस्तै सौजन याख्खा राई, टेकेन्द्र थापा, विजय श्रेष्ठ र निराजन महर्जन टोलीमा रहँदा चोटका कारण योगेश गुरुङले खेल्ने सम्भावना न्युन छ ।

दोस्रो राउन्डको खेल सकिदा बुटवल लुम्बिनी ४ अंक जोडेर शीर्षस्थानमा रहेको छ । समान ३ अंक रहेपनि गोल अन्तरमा विराटनगर दोस्रो, धनगढी तेस्रो, काठमाडौं चौथो र पोखरा पाँचौ स्थानमा रहेको छ । चितवन दुई अंक जोडेर छैटौ स्थानमा रहँदा १ अंक जोडेको ललितपुर पुछारमा रहेको छ ।

नेपाल स्पोर्टस म्यानेजमेन्टले आयोजना तथा अखिल नेपाल फुटबल संघको प्राविधिक सहयोगमा हुने एनएसएलमा ७ शहरका ७ टोलीको सहभागिता रहेको छ । राउण्ड रोबिनको आधारमा हुने लिग १ जेठसम्म सञ्चालन हुनेछ । एनएसएलमा विराटनगर सिटी फुटबल क्लब, काठमाडौं रेजर्स फुटबल क्लब, ललितपुर सिटी फुटबल क्लब, एफसी चितवन, धनगढी एफसी, पोखरा थन्डर्स र बुटवल लुम्बिनी एफसी रहेका छन् ।

प्रतियोगिताको विजेताले ३५ लाख रुपैयाँ प्राप्त गर्नेछन् । उपविजेताले १५ लाख रुपैयाँ हात पार्नेछन् । व्यक्तिगत विधाका सबै उत्कृष्ट र उत्कृष्ट युवा खेलाडीले जनही १ लाख रुपैया हात पार्नेछन् । यस्तै हरेक खेलको प्लेयर अफ दि म्याचले २५ हजार तथा हरेक खेलको इमर्जिङ प्लेयर अफ दि म्याचले १० हजार रुपैयाँ पाउनेछन् ।