काठमाडौं (हाम्रो खेलकुद) – आर्मीका फरवार्डद्धय जर्जप्रिन्स कार्की र टेक बहादुर बुढाथोकीको गोल मद्दतमा एफसी चितवनले पहिलो संस्करणको खुकुरी नेपाल सुपर लिग (एनएसएल) फुटबलमा बुटवल लुम्विनीविरुद्ध पहिलो हाफमा २–१ को अग्रता लिएको छ ।

बुटवल लुम्विनीका आशिष लामाले एक गोल फर्काएका छन् । त्रिपुरेश्वरस्थित दशरथ रंगशालामा बुधबार भएको खेलको १५औं मिनेटमा जर्जप्रिन्सले गोल गर्दै चितवनलाई १–० को अग्रता दिलाएका हुन् । गोरान जर्काेभिचले दिएको पासलाई सिक्स यार्ड बक्सभित्र ओमोलाजा नुरेन करिमले क्लियर गर्न नसकेको बललाई जर्जप्रिन्सले ट्यापिङ गोल गरेका हुन् ।

१८औं मिनेटमा टेक बहादुर बुढाथोकीले गोल गर्दै चितवनको अग्रता दोब्बर पारे । उनले सिमन्त थापाको क्रसमा गोलरक्षक विशनल श्रेष्ठले बचाउन नसकेको बललाई दोस्रो प्रयासमा गोल गर्न सफल भएका थिए । त्यसअघि आठौं मिनेटमा ओमोलाजा करिम नुरेनको पेनाल्टी बक्सबाहिरको सशक्त प्रहार क्रसबारबाट थोरै माथिबाट बाहिरिदा बुटवल लुम्विनी अग्रता लिनबाट चुक्यो ।

२५औं मिनेटमा अर्मान्डको प्रहार क्रसबारमा लागेर फर्कदा बुटवल लुम्विनी गोल अन्तर कम गर्नबाट चुक्यो । ३१औं मिनेटमा आशिष लामाले गोल गर्दै खेललाई २–१ को स्थितिमा ल्याए । उनले पेनाल्टी बक्सबाहिरबाट गरेको सशक्त प्रहार गोलरक्षक विशाल सुनारले बचाउने प्रयास गरेपनि सफल भएन ।

३७औं मिनेटमा जर्जप्रिन्स कार्कीले सुवर्ण अवसर पाएपनि सदुपयोग गर्न सकेन । ३९औं मिनेटमा अर्मान्डको प्रहारलाई गोलरक्षक विशाल सुनारले ब्लक गर्दै बुटवल लुम्विनीको गोल टारे । दोस्रो हाफ केही वेरमा शुरु हुनेछ ।

चितवन पहिलो जितको खोजीमा हुनेछ । चितवन पहिलो खेलमा ललितपुर सिटी एफसीसँग १–१ गोलको बराबरी खेलेको थियो । बुटवल लुम्विनी लगातार दोस्रो जितको खोजीमा छ । बुटवल लुम्विनीले पहिलो खेलमा पोखरा थन्डर्सलाई २–० ले हराएको थियो ।