काठमाडौं (हाम्रो खेलकुद) – खुकुरी नेपाल सुपर लिग (एनएसएल) फुटबलमा आज एक खेलमा मात्रै प्रतिस्पर्धा हुदा धनगढी एफसी र काठमाडौं रेजर्स आमने समाने हुँदैछन् । धनगढी र काठमाडौं रेजर्सबीचको खेल साँझ ५:३० बजेपछि त्रिपुरेश्वरस्थित दशरथ रंगशालामा हुनेछ ।

स्टार र नाम चलेका खेलाडीले भरिएको यि दुई टोलीबीचको खेल निकै रोमाञ्चक र प्रतिस्पर्धात्मक हुने अपेक्षा गरिएको छ । धनगढी एनएसएलमा पहिलो जितको खोजीमा हुनेछ । धनगढी पहिलो खेलमा विरानगर सिटी एफसीसँग ३–० ले स्तब्ध बनेको थियो । काठमाडौंको १ खेलबाट ३ अंक छ । धनगढीले अंकको खाता खोल्न सकेको छैन ।

धनगढीसँग कप्तान किरण चेम्जोङ, विशाल राई, आफिज ओलावाले, दिनेश राजवंशी, विवेक बस्नेत, निशान खड्का, टंक बस्नेत, पुजन उपरकोटी, दर्शन गुरुङ, योगेश गुरुङ, युद्ध शाही, सौजन याख्खा राई, विजय श्रेष्ठ, निराजन महर्जन, अशोक खवास र टेकेन्द्र थापा,रहेको छ ।

यता, काठमाडौं रेजर्स धनगढीलाई हराउँदै लगातार दोस्रो जित निकाल्दै शीर्षस्थानमा उक्लिने दाउमा हुनेछ । काठमाडौंले पहिलो खेलमा ललितपुरलाई १–० ले पराजित गरेको थियो । बराबरीको नतिजाले पनि काठमाडौं शीर्षस्थानमा उक्लनेछ । टोलीसँग मार्की खेलाडी तथा कप्तानको रुपमा गोलरक्षक विकेश कुथु रहँदा विदेशी खेलाडीमा मेसौके ओलुमोउ, स्टेफेन समिर र फ्लोरेन्ट कोर्वा रहेका छन् ।

यस्तै तेज तामाङ, सन्जोक राई, त्रिदेव गुरुङ, सुदिप शिख्रकार, राजन गुरुङ, विश्वास श्रेष्ठ, बिमल पाण्डेय, आशिष गुरुङ, विनय श्रेष्ठ, रुमेश बर्तौला, अन्जन राई, पृथ्बी चौधरी, सुदिल राई र प्रेजेन तामाङ टोलीमा रहेका छन् ।

नेपाल स्पोर्टस म्यानेजमेन्टले आयोजना तथा अखिल नेपाल फुटबल संघको प्राविधिक सहयोगमा हुने एनएसएलमा ७ शहरका ७ टोलीको सहभागिता रहेको छ । राउण्ड रोबिनको आधारमा हुने लिग १ जेठसम्म सञ्चालन हुनेछ । एनएसएलमा विराटनगर सिटी फुटबल क्लब, काठमाडौं रेजर्स फुटबल क्लब, ललितपुर सिटी फुटबल क्लब, एफसी चितवन, धनगढी एफसी, पोखरा थन्डर्स र बुटवल लुम्बिनी एफसी रहेका छन् ।

प्रतियोगिताको विजेताले ३५ लाख रुपैयाँ प्राप्त गर्नेछन् । उपविजेताले १५ लाख रुपैयाँ हात पार्नेछन् । व्यक्तिगत विधातर्फका उत्कृष्टले जनही १ लाख तथा उत्कृष्ट युवा खेलाडीले पनि १ लाख रुपैया हात पार्नेछन् । हरेक खेलको म्यान अफ दि म्याचले २५ हजार रुपैयाँ पाउने छन् ।