काठमाडौं (हाम्रो खेलकुद) – पहिलो संस्करणको खुकुरी नेपाल सुपर लिग (एनएसएल) मा एक खेलमा मात्रै प्रतिस्पर्धा हुदा ललितपुर सिटी एफसी र एफसी चितवनबीच प्रतिस्पर्धा हुदैछ ।

खेल त्रिपुरेश्वरस्थित दशरथ रंगशालामा साँझ ५ः३० बजेपछि हुनेछ । अन्जन विष्टको कप्तानीमा रहेको ललितपुर पहिलो जित निकाल्ने लक्ष्यमा मैदानमा उत्रनेछ । ललितपुर पहिलो खेलमा काठमाडौं रेजर्ससँग १–० ले पराजित भएको थियो ।

ललितपुरसँग कप्तान अन्जन विष्ट, कमल श्रेष्ठ, प्रवेश दनुवार, मिक्चेन तामाङ, एरिक विष्ट, नविन लामा, विमल राना, सरोज योन्जन लामा, रन्जन विष्ट, निरोज बस्नेत, पाल्साङ लामा, गौरव बुढाथोकी र गोलरक्षक अर्पण कार्की रहँदा विदेशी खेलाडीको रुपमा नुर्लान नोभरुजोभ, भिलिम पोसिन्कोभिक र पिटर सेगुन रहेका छन् । श्रम स्वीकृति नमिलेका कारण पिटरले काठमाडौं विरुद्धको खेल गुमाएका थिए । सम्भवत उनले आजको खेल खेल्ने सम्भावना छ ।

हिडन ट्यालेन्टका रुपमा ललितपुरले डोना थापालाई पनि भित्राएको छ । गत वर्ष चोट मुक्त भएर फर्केका मिडफिल्ड डोनाले गत वर्ष बी डिभिजन लिग समेत खेलेका थिए । त्यस्तै पछिल्ला दिनमा उनी मोसफलका नकआउट प्रतियोगितामा व्यस्त थिए । मछिन्द्र क्लबबाट विराटगोल्ड कप खेलेका डोनाले जीतपुरसिमरा गोल्ड कपमा आयोजन नवजागृती युवा क्लबबाट उत्रेका थिए । एनएसएललाई लिएर आफू उत्साहित रहेको जनाउँदै डोनाले भने,‘ अन्तिम समयमा आएर मात्र टोलीमा जोडिए । एक दिन मात्र टोलीसँग अभ्यास गरे । मौका पाए भने आफ्नो तर्फबाट शतप्रतिशत दिनेछु ।’

परिस्थिति अनुसार डोनाले खेल्ने अवसर पाउने ललितपुरका प्रशिक्षक प्रदीपक हुमागाईले जनाए । ‘ कमब्याकपछि पछिल्लो समय उनले राम्रो गरिरहेका छन् , उनले भने,‘ टोलीको आवश्यकता अनुसार हामी उनलाई प्रयोग गर्नेछौं । ठ्याकै कुन खेलमा मौका पाउँछन् । त्यो भन्दा सकिन्न ।

यता, चितवन पनि ललितपुरलाई स्तब्ध पार्दै एनएसएलमा सुखद सुरुवात गर्न चहान्छ । चितवनसँग कप्तान तथा मार्की खेलाडी भरत खवास, विकास तामाङ, शिशिर लेखी, कुलदिप कार्की, मनिष थापा, रुप बहादुर लामा, अमित तामाङ, विकास खवास, विश्व अधिकारी, राजीव लोप्चन, टेक बहादुर बुढाथोकी र गोलरक्षक रोमन रसाइली रहेका छन् । विदेशी खेलाडीको रुपमा गोरान जर्काेभिच, अहमद गाबल्ला र इएल सायद सावान रहेका छन् ।

एनएसएलमा हालसम्म तीन खेल सम्पन्न हुदा काठमाडौं रेजर्स, विराटनगर सिटी एफसी र बुटवल लुम्विनी फुटबल क्लबले समान ३ अंक जोडेका छन् । ललितपुर, धनगढी सिटी एफसी र पोखरा थन्डर्सले अंकको खाता खोल्न सकेका छैनन् ।

नेपाल स्पोर्टस म्यानेजमेन्टले आयोजना तथा अखिल नेपाल फुटबल संघको प्राविधिक सहयोगमा हुने एनएसएलमा ७ शहरका ७ टोलीको सहभागिता रहेको छ । राउण्ड रोबिनको आधारमा हुने लिग १ जेठसम्म सञ्चालन हुनेछ । एनएसएलमा विराटनगर सिटी फुटबल क्लब, काठमाडौं रेजर्स फुटबल क्लब, ललितपुर सिटी फुटबल क्लब, एफसी चितवन, धनगढी एफसी, पोखरा थन्डर्स र बुटवल लुम्बिनी एफसी रहेका छन् ।

प्रतियोगिताको विजेताले ३५ लाख रुपैयाँ प्राप्त गर्नेछन् । उपविजेताले १५ लाख रुपैयाँ हात पार्नेछन् । व्यक्तिगत विधातर्फका उत्कृष्टले जनही १ लाख तथा उत्कृष्ट युवा खेलाडीले पनि १ लाख रुपैया हात पार्नेछन् । हरेक खेलको म्यान अफ दि म्याचले २५ हजार रुपैयाँ पाउने छन् ।