काठमाडौं (हाम्रो खेलकुद) –  काठमाडौं रेजर्सले  खुकुरी नेपाल सुपर लिग (एनएसएल) मा विजयी सुरुवात गरेको छ ।

त्रिपुरेश्वरस्थित दशरथ रंगशालामा ललितपुर सिटी एफसीलाई १-०ले हराउँदै काठमाडौंलेल घरेलु फुटबलको पहिलो फ्रेन्चाईज लिगमा जितबाट सुरुवात गरेको छ । ६६ औं मिनेटमा मेसौके ओलुमोउको गोलबाट काठमाडौंले अग्रता बनाएको थियो । त्यहि गोल खेलको निर्णायक बन्यो। एनले अर्का विदेशी खेलाडी स्टेफन समिरले प्रहार गरेको बललाई गोलरक्षकले रिबाउन्ड गरेको बललाई पोष्टको दिशा दिएका थिए।

त्यसअघि खेलको ३३ औं मिनेटमा काठमाडौका स्टेफनको प्रहार बारमा लागेर फर्कदा अग्रता बनाउनबाट चुकेको थियो। खेलको ७१ औं मिनेटमा ललितपुरका  नुर्लान जहिदले गरेको प्रहार गोलरक्षक विकेश कुथुले राम्रो बचाउ गरे। दोस्रो हाफको अतिरिक्त समयमा गरेको दुई प्रहारलाई विकेशले रोक्दा ललितपुरले बराबरी गर्न सकेन ।  

काठमाडौले ३ विदेशी खेलाडी मैदान उतार्दा ललितपुरको साथमा २ विदेशी खेलाडी थिए। काठमाडौंका सन्जोक राई म्यान अफ दी म्याच र विश्वास श्रेष्ठ उदीयमान खेलाडी घोषित भए । सन्जोकले २५ हजार र विश्वासले १० हजार रुपैयाँ प्राप्त गरे ।
एनएसएलमा आइतबार विराटनगर सिटी एफसी र धनगढी एफसीबीच खेल दिउँसो २ः३० बजे खेल सुरु हुनेछ। आइतबार नै साँझ ५ः३० बजे दोस्रो खेलमा लुम्बिनी एफसीले पोखरा थन्डर्सको सामना गर्नेछ।

घरेलु फुटबलमा पहिलो पटक आयोजित फ्रेन्चाइज फुटबलमा ७ टोलीको सहभागिता छ । प्रतियोगिताको विजेताले ३५ लाख रुपैयाँ प्राप्त गर्नेछन् । उपविजेताले १५ लाख रुपैयाँ हात पार्नेछन् ।

व्यक्तिगत विधातर्फका उत्कृष्टले जनही १ लाख तथा उत्कृष्ट युवा खेलाडीले पनि १ लाख रुपैया हात पार्नेछन् । हरेक खेलको म्यान अफ दि म्याचले २५ हजार रुपैयाँ पाउने छन् ।