काठमाडौं (हाम्रो खेलकुद)– घरेलु फुटबलमा पहिलो पटक शनिबार सुरु हुने फ्रेन्चाईज फुटबल लिग खुकुरी नेपाल सुपर लिग (एनएसएल) को सहभागी टोली एफसी चितवनले शनिबार जर्सी सार्वजनिक गरेको छ ।

एफसी चितवनले शनिबार एक कार्यक्रममा आयोजना गर्दै लिनिङ ब्रान्डले प्रायोजन गरेको जर्सी शनिबार डिजिटल माध्ययमबाट सर्वाजनिक गरेको हो । डिस होमको मुख्य प्रायोजक रहेको चितवन टोलीले एनएसएलमा लिनिङ ब्रान्डको जर्सी प्रयोग गर्नेछ । टोलीले यस अघि नै किट्स पार्टनरको रुपमा लिनिङसँग सम्झौता गरेको थियो ।

एफसी चितवनका प्रबन्ध निर्देशक सचिन ढकाल र लिनिङका प्रबन्धक कृतराज महर्जनले डिजिटल माध्ययमबाट जर्सी सार्वजनिक गरे । उनीहरुले टोलीले प्रयोग गर्ने होम एण्ड अवे गरि दुई खाले जर्सी सार्वजिनक गरेका हुन् । मेघराज केसी मुख्य र शैलेश कर्माचार्य सहायक प्रशिक्षक रहेको चितवनका मार्की खेलाडीमा राष्ट्रिय टोलीका फरवार्ड खेलाडी भरत खवास रहेका छन् । टोलीमा दुई इजिप्सियन र एक सर्वियन खेलाडी छन् ।

दशरथ रंगशालामा जेठ १ गते सम्म सञ्चालन हुने एनएसएलमा सोमबार ललितपुर सिटी फुटबल क्लबसँग खेल्दै चितवनले यात्राको सुरुवात गर्नेछ । एसएसएलको शनिबार हुने उद्घाटन खेलमा ललितपुरले काठमाडौं रेजर्सको सामना गर्नेछ । उपाधि जित्ने लक्ष्यका साथ अभ्यास गरिरहेको टोलीका मुख्य प्रशिक्षक केसीले बताए । एनएसएलमा ७ टोलीले प्रतिस्पर्धा गर्नेछन् । अखिल नेपाल फुटबल संघ (एन्फा) को प्राविधिक सहयोगमा सञ्चालन हुने प्रतियोगिता राउन्ड रोविन लिग प्रणालीका आधारमा सञ्चालन हुनेछ ।

एनएसएलमा राउन्ड रोविनका २१, प्लेअफ, क्लालिफायर, इलिमिनेटर र फाइनल गरि २५ खेल हुनेछन् । एनएसएलको पहिलो संकरणको विजेता उपाधिसहित ३५ र दोस्रो हुने टोलीले १५ लाख प्राप्त गर्नेछ । विधागत उत्कृष्ट र उदियमान खेलाडीले समान १ लाख रुपैयाँ प्राप्त गर्नेछन् । त्यस्तै हरेक खेलमा म्यान अफ दी म्याचले २५ हजार रुपैयाँ प्राप्त गर्ने आयोजक नेपाल स्पोर्टस् एण्ड इभेन्ट्स प्रालीले जनाएको छ ।