भरतपुर (हाम्रो खेलकुद) – ए डिभिजन टोली हिमालयन शेर्पा क्लब चितवनमा जारी टुबोर्ग १२ औं विकास रनिङ शिल्ड अन्तर्राष्ट्रिय आमन्त्रण नकआउट फुटबल प्रतियोगिताको क्वाटरफाइनलमा पुगेको छ ।
नारायणगढस्थित क्याम्पाचौरमा भएको पहिलो चरणको अन्तिम खेलमा मेयोङको २ गोलको मद्दतमा काठमाडौंको ब्वाइज युनियन क्लबंलाई ३–१ ले हराउँदै हिमालयन शेर्पा अन्तिम आठमा पुगेको हो ।
शनिबारको नतिजापछि क्वाटरफाइनल समिकरण पुरा भएको छ । हिमालयन शेर्पाले अब सेमीफाइनल प्रवेशका लागि त्रिभुवन आर्मी क्लबसँग प्रतिस्पर्धा गर्नेछ । आर्मी बाईपाएर सोझै क्वार्टरफाइन पुगेको थियो ।

ब्वाइज युनियसँगको खेलमा हिमालयन शर्पाका खेलाडी बलअघि बढाउने प्रयासमा ।

खेलको ११ औँ मिनेटमा विष्णु गुरुङको गोलबाट हिमालयनले अग्रता लिएको थियो । ६९ औं मिनेटमा हिमालयनका मेयोङले गोल थपे । ७२ औं मिनेटमा ब्वाइज युनियनका विजय पौडेलले गोल फर्काउँदै टिमको आशा जगाए । ८५ औं मिनेटमा हिमालयनका मेयोङले अर्को गोल गरेपछि ब्वाइज युनियनको सम्भावना कमजोर भएको थियो । म्यान अफ दी म्याच मेयोङले १० हजार रुपैयाँ पुरस्कार पाए । प्रतियोगितामा आइतबारबाट क्वाटरफाइनलका खेल सुरु हुनेछ । पहिलो क्वार्टरफाइनलमा मोरङ फुटबल क्लब र सहारा क्लब पोखराबीच प्रतिस्पर्धा हुने प्रचारप्रसार समितिका संयोजक सिद्धार्थलाल चुकेले जानकारी दिए ।

भोलीको क्वार्टरफाइनल
मोरङविरुद्ध सहारा क्लब पोखरा – दिउँसो २ः३० बजे