काठमाडौं (हाम्रो खेलकुद) – खुकुरी नेपाल सुपर लिग (एनएसएल) अन्तर्गत फुटबल क्लब चितवनले व्यवस्थापकमा रुपेश अधिकारीलाई नियुक्त गरेको छ । एन्फाका केन्द्रीय सदस्य समेत रहेका अधिकारीले टोलीको जिम्मेवारी सम्हालेको क्लबले जनाएको छ ।

व्यवस्थापक अधिकारीले आफूले पारिश्रमिक वापत प्राप्त गर्ने सम्पूर्ण रकम खेलाडीलाई सहयोग गर्ने घोषणा गरेका छन् । उनले चोटका कारण मैदानबाहिर रहेका राष्ट्रिय टोलीका फरवार्ड सावित्रा भण्डारी र हिरा भुजेलसँगै नेपाल यू१९ राष्ट्रिय टोलीकी सदस्य समिक्षा घिमिरेलाई सहयोग गर्ने बताएका छन् ।

चितवनको स्वामित्व आइएमई ग्रुप अन्तर्गत संचालित गेम अन प्रा.लिले खरिद गरेको छ । क्लबको अध्यक्षमा सचिन ढकाल छन् । टोलीले प्रशिक्षकमा रुस्लान थ्री स्टारका पूर्व प्रशिक्षक मेघराज केसीलाई नियुक्त गरेको थियो । भरत खवास टोलीको मार्की खेलाडी रहेका छन् ।

एफसी चितवनको टोली : भरत खवास (मार्की खेलाडी), विशाल सुनार* (२ लाख रुपैयाँ), विकास तामाङ (१ लाख), विकास खवास* (२ लाख), रोमन रसाइली (५० हजार), शिशिर लेखि (५० हजार), कुलदीप कार्की* (१ लाख २० हजार), अमित तामाङ (५० हजार), राजीव लोप्चन (५० हजार), टेक बहादुर बुढाथोकी* (१ लाख २० हजार), मनिष थापा* (७५ हजार), रुपबहादुर लामा* (७५ हजार), सिमान्त थापा (२० हजार), विश्व अधिकारी (२० हजार), विवश चौधरी (२० हजार)