सुबास हुमागाईं, काठमाडौं

एएफसी कपको दक्षिण एसियाली छनोट अन्तर्गत प्लेअफ चरणको खेल खेल्ने तयारीमा रहेको त्रिभुवन आर्मी फुटबल क्लबका खेलाडीमा कोरोना संक्रमण देखिएको छ ।

श्रीलंका पुलिस स्पोर्टस् क्लबसँगको खेलको पूर्व सन्ध्यामा मंगलबार साँझ आर्मी टोलीले दशरथ रंगशालामा प्रशिक्षण गर्दा ४ खेलाडी अनुपस्थित थिए । स्रोतका अनुसार खेलको अघिल्लो दिन गरिएको कोरोना परिक्षणमा चार खेलाडी र अफिसियलमा कोरोना संक्रमण देखिएको हो । खेलाडीको रिपोर्ट पुन: पुष्टिका लागि पठाइएको र अर्को रिपोर्टपछि मात्र ती खेलाडी सहभागिता बारे यकिन निर्णय हुनेछ ।

कोरोना संक्रमणका बाबजुद खेल भने आयोजना हुने देखिएको छ । खेल नेपाली समयानुसार साँझ ५ः३० बजे दशरथ रंगशालमा सुरु हुने अखिल नेपाल फुटबल संघ (एन्फा) ले जनाएको छ । यद्यपि संक्रमित खेलाडी भने सेल्फ आइसोलेसनमा रहेर खेलमा सहभागिता जनाउने छैनन् । यसअघि एएफसी च्याम्पियन्स लिगको खेलका दौरान पनि खेलाडीमा कोरोना संक्रमण देखिएपनि पाहुना टोली आइसकेकाले एएफसीले खेल आयोजना गरेको थियो ।

यसअघि नेपाली राष्ट्रिय फुटबल टोलीका केहि खेलाडीमा संक्रमण देखिँदा नोभेम्बरमा भएको बंगलादेश भ्रमण केहि खेलाडीले गुमाएका थिए । अन्य खेलाडीले भने बंगलादेश गएर दुई खेल खेलेका थिए ।

यो पनि : एएफसी कप छनोट : आर्मीको लक्ष्य अन्तिम चरण