काठमाडौं (हाम्रो खेलकुद)– थ्री नेसन्स कप मैत्रीपूर्ण अन्तर्राष्ट्रिय फुटबल च्याम्पियन टोलीका खेलाडीलाई अखिल नेपाल फुटबल संघले अर्को महिना सुरु हुने फ्रेन्चाईज लिग नेपाल सुपर लिग (एनएसएल) का लागि छाड्ने भएको छ ।

‘एन्फाको निर्णय अनुसार आजबाट जान चाहने खेलाडी जान सक्छन्’, एन्फाका केन्द्रिय सदस्य समेत रहेका राष्ट्रिय टोलीका व्यवस्थापक मधुसुदन उपाध्यायले भने,’एनएसएलका लागि खेलाडी रिलिज गरेका छौं । भोलीसम्म सबै खेलाडीले होटल छाड्नेछन् ।’ थ्री नेन्सस कपका लागि नेपाली टोली सोल्टी होटलमा बस्दै आएको छ ।

बंगलादेशलाई सोमबार २–१ ले हराउँदै नेपाली राष्ट्रिय टोली च्याम्पियन बनेको थियो । दशरथ रंगशालामा ३७ वर्षपछि राष्ट्रिय टोलीले उपाधि जितेको थियो । सन् १९८४ मा पहिलो दक्षिण एसियाली महासंघिय खेलकुद (साफ) यता सिनियर टोलीले जितेको यो नै पहिलो उपाधि हो ।

एनएसएलको तयारीका लागि राष्ट्रिय अधिकांश खेलाडी विभिन्न ७ क्लबमा आबद्ध भएका छन् । राष्ट्रिय टोलीकै सदस्यहरु अलग अलग टोलीका मार्की खेलाडी घोषित भइसकेका छन् । एनएसएल वैशाख ११ देखि २५ गते सम्म दशरथ रंगशालामा हुँदैछ । फ्रेन्चाईज टोलीले आ आफ्नो तयारी सुरु गर्ने क्रममा छन् । त्रिभुवन आर्मी फुटबल क्लबका खेलाडी भने एएफसी कपमा सहभागी हुन टोलीको क्याम्पमा सहभागी हुनेछन् । आर्मीले चैत्र २५ गते श्रीलंका पुलिसको सामना गर्दैछ ।

राष्ट्रिय टोलीका सदस्य विशाल राई धनगढी एफसीको, भरत खवास चितवन एफसीको, विकेश कुथु काठमाडौं रेजर्स एफसीको, रञ्जित धिमाल विराटनगर सिटी एफसीको, विशाल श्रेष्ठ बुटवल लुम्बिनी एफसीको, नवयुग श्रेष्ठ पोखरा थन्डर्स र अन्जन विष्ट ललितपुर सिटी एफसीको मार्की खेलाडी हुन् । चैत ६ गते भएको अक्सनबाट सबै टोलीले समान १४ खेलाडी खरिद गरिसकेका छन् ।

राष्ट्रिय फुटबल टोलीका कप्तान किरण चेम्जोङ, रोहित चन्द, अनन्त तामाङ भने अक्सनमा समावेश थिएनन् । त्यस्तै सोमबारबाट अन्तर्राष्ट्रिय फुटबलबाट सन्यास लिएका विराज महर्जन अक्सनमा अनसोल्ड भएका थिए । अक्सनमा नरहेका राष्ट्रिय टोलीका खेलाडीले एनएसएल खेल्ने नखेल्ने विषयमा अझै तय भएको छैन । हरेक टोलीले ३ विदेशी खेलाडी राख्न पाउने प्रावधान छ । एनएसएल लगत्तै राष्ट्रिय टोलीको बन्द प्रशिक्षण पुनः सुरु हुने व्यवस्थापक उपाध्यायले जानकारी दिए ।