एजेन्सी – पाकिस्तान फुटबलमा आन्तरिक विवाद फेरि चर्किएपछि फिफाबाट फेरि प्रतिबन्ध लाग्ने खतरा बढेको छ । सैयद असफका हुसेन शाहको निर्वाचित पाकिस्तान फुटबल महासंघ (पिएफएफ) समितिले मुख्य कार्यालय शनिबार कब्जा गरेपछि पुनः विवाद चुलिएको हो ।

निर्वाचित समिति विवादित बनेपछि फिफाले मलिक हारोनको नेतृत्वमा नर्मलाइजेसन कमिटी गठन गरेको थियो । नर्मलाइजेसन समितिले नयाँ निर्वाचन गराउनको सट्टा आफै प्रतियोगिता सञ्चालन गरेपछि निर्वाचित समितिले मुख्यालय कब्जा गरेको थियो । नर्मलाइजेसन समितिले सञ्चालन गरिरहेको वमेन्स महिला लिग पनि अनिश्चित कालका लागि स्थगित भएको छ ।

नेपाली महिला राष्ट्रिय तथा एपिएफका ४ खेलाडी नेसनल वमेन्स फुटबल च्याम्पियनसिपको सहभागी टोली मासा युनाइटेडबाट खेल्दै आइरहेका थिए । गोलकिपर एन्जेला तेम्बाफो सुब्बा, अनिता केसी, सरु लिम्बु, गिता राना मासाबाट खेलिरहेका छन् ।

मासाले ४ खेलमा ३ जित र १ बराबरी खेलेको थियो । समूह विजेताका रुपमा मासा क्वार्टरफाइनल पुगेको छ । आफूहरु अन्यौलमा रहेको पाकिस्तानबाट सरुले बताएकी छिन् । ‘हामीलाई यहाँको समस्याको बारमो खासै जानकारी छैन, उनले भनिन्, ‘केहि समय कुर्न भनिएको छ । हामी त्यहि खबरको प्रतिक्षामा छौं ।’

निर्वाचित समितिले सन् २०१९ सेप्टेम्बरमा नर्मलाइजेसन समितिलाई कार्यभार सुम्पेको थियो । शुक्रबार असफाक नेतृत्वको समितिले कार्यसमिति र कंग्रेस गरेको थियो । त्यो भेलाले नर्मलाइजसेन समितिको कामप्रति असुन्तुष्टी जनाएको थियो ।