काठमाडौं (हाम्रो खेलकुद)– राजु काजी शाक्यले फुटबल जीवनमा दुई वटा भूमिका निर्वाह गरे । झन्डै ४ दशकको फुटबल यात्रामा आधा जति खेलाडी र त्यसपछि प्रशिक्षकको भूमिकामा सक्रिय रहे । तर, यसपटक अर्को महिना आयोजना हुने पहिलो फ्रेन्चाईज लिग नेपाल सुपर लिग (एनएसएल) मा फरक भूमिकामा देखा पर्ने भएका छन् । फ्रेन्चाइज टोली बुटवल लुम्बिनी एफसीले उनलाई महाप्रबन्धकको रुपमा नियुक्त गरेको छ ।

‘मैले जीवनमा फुटबल बाहेक केहि सोचिन । खेलाडी र प्रशिक्षकका रुपमा आफूलाई प्रस्तुत गरे,’ उनले भने, ‘अहिले फरक परिस्थितिमा फरक भूमिका पाएको छु । लुम्बिनी बुटवलले मलाई जुन सम्मान दिएको छ त्यसका लागि धन्यवाद दिन चाहन्छु । आफ्नो ठाँउबाट टोलीलाई एसएसएलमा उच्च प्रदर्शनका लागि सहयोग गर्नेछु ।’

एनएसएल घरेलु फुटबलमा एउटा नयाँ प्रयोगलाई सुखद सुरुवातको संकेत गर्दै शाक्यले भने,’ एनएसएलको गृहकार्य केहि नपुगेको देखिएपनि प्रयास राम्रो हो । भविष्यमा सुधार हुँदै जान्छ भन्ने आशा गरौं ।’ बुटवलले सनोज श्रेष्ठलाई प्रशिक्षक र उज्जवल मानन्धरलाई गोलकिपर प्रशिक्षकका रुपमा नियुक्त गरेको छ । त्यस्तै क्लबले डा. रविन्द्र बस्नेतलाई फिजियो आबद्ध गराएको छ ।

गोलकिपर विशाल श्रेष्ठलाई मार्की खेलाडीका रुपमा लिएको बुटवलले अक्सनबाट शत्रुधन चौधरी, जय गुरुङ, अमिर श्रेष्ठ, लक्ष्मण रुचाल, अनिल महर्जन, सेसेहाङ आङ्दबे लिएको थियो । त्यस्तै सुरज विक, रन्दीप पौडे, रविन श्रेष्ठ, रवि थापा मगर, चेतनकुमार थारु, मानबहादुर परियारलाई पनि टोलीले अक्सनबाट लिएको छ ।

बुटवल सन्तुली टोली रहेको उल्लेख गर्दै शाक्यले भने, ‘लगभग सबै टोली उस्तै छ्रन् । केहि राम्रो विदेशी खेलाडी लिने विषयमा छलफल अघि बढेको छ, उनले भने, अधिकांश क्लबको आशा राम्रा विदेशी खेलाडी ल्याउने भन्नेमा देखिन्छ । ७ टोलीको सहभागितामा एनएसएल वैशाख ११ देखि २५ गते सम्म दशरथ रंगशालामा हुनेछ ।’

खेलाडीका रुपमा सन् १९८४ मा तत्कालिन प्रथम दक्षिण एसियाली महासंघिय खेलकुद (साफ) हालको साग र छैटौं साफ (१९९३) मा स्वर्ण पदक जितेका शाक्यले २०१६ मा १२ औं सागमा प्रशिक्षकका रुपमा स्वर्ण पदक जितेका थिए ।