सुबास हुमागाईं, काठमाडौं

नेपाली राष्ट्रिय फुटबल टोलीले थ्री नेसन्स कपको पहिलो खेलमा बिहिबार किर्गिस्तानविरुद्ध नयाँ जर्सी प्रयोग गर्यो । अखिल नेपाल फुटबल संघ (एन्फा) र पोशाक उत्पादक संस्था केटिएम सिटीबीच भएको एक वर्षे सम्झौता अनुसार उत्पादित यस जर्सीमा फिफाको खेल सामग्री सम्बन्धि नियमावली भने तोडिएको पाइएको छ ।

फिफाको नियमावली अनुसार कुनैपनि सामग्री उत्पादन कम्पनिले आफ्नो मुख्य लोगोबाहेक अन्य कुनैपनि स्थानमा कम्पनिको पहिचान झल्कने डिजाइन प्रयोग गर्न पाउँदैन । जर्सीमा मुख्य लोगोका रुपमा २० स्क्वायर सेन्टिमिटरको लोगो बाहेक उत्पादक सामग्रीको अन्य केहि पहिचान प्रष्ट हुने डिजाइन प्रयोग गर्न नपाइने उल्लेख गरिएको छ । तर केटिएमको जर्सीको काँधको भागमा प्रष्ट रुपमा केटिएम लेखिएको छ, जुन नियम विपरित रहेको छ ।

एन्फाले यसबारे पोशाक उत्पादक संस्था केटिएमलाई नियमावलीबारे जानकारी दिइएको र त्यसैअनुसार जर्सी बनाएको बताएको थियो । केटिएमले भने उक्त डिजाइन नियम अनुसार नै रहेको अड्डी कस्यो । केटिएमका हेड अफ मार्केटिङ रविन केसीले डिजाइन एन्फाबाट स्वीकृत भएपछि मात्र जर्सी निर्माण गरेको बताए । उनले उक्त डिजाइनमा पनि कुनै समस्या नरहेको दावी गरे ।

फिफाको फिफाको खेल सामग्री नियमावलीको दोस्रो सेक्सनको ८.३ नियममा जर्सीमा सिंगारका रुपमा प्रयोग हुने डिजाइनले जर्सी निर्माताको परिचय, विज्ञापन, कुनै किसिमको सन्देश अथवा कुनै देश, धर्म, राजिनिती वा कुनै आकृति राखेर प्रस्तुत गर्न पाइन्न भन्ने उल्लेख गरिएको छ । यस्तै छैटौं सेक्सनको नियम नम्बर ४१ मा पनि कुनै निर्माता कम्पनिले कुनै पनि डिजाइनमार्फत आफ्नो विज्ञापन गर्न नपाइने उल्लेख छ ।

किर्गिस्तान यू-२३ विरुद्ध नेपालले गोलरहित बराबरी खेलेको थियो । उक्त खेल भने फिफाको मान्यताप्राप्त अन्तर्राष्ट्रिय खेल थिएन । अब शनिबार बंगलादेशविरुद्ध हुने खेल भने आधिकारिक खेल हुनेछ । उक्त खेलमा नियम विपरित जर्सी लगाए फिफाले कारवाही पनि गर्न सक्छ ।