काठमाडौं (हाम्रो खेलकुद) – पे वेल नेपाल प्रालि नेपाल सुपर लिग (एनएसएल) को टिकेटिङ पार्टनर बनेको छ । आयोजक नेपाल स्पोर्टस् एन्ड इभेन्ट म्यानेजमेन्टले एक पत्रकार सम्मेलन गर्दै पे वेल टिकेटिङ पार्टनर रहेको जनाएको छ ।

नेपाल स्पोर्टस् एन्ड इभेन्ट म्यानेजमेन्ट अध्यक्ष आश्रयता कार्की चौधरी र पे वेलका कार्यकारी अध्यक्ष भिम प्रसाद तिमिल्सिनाले सम्झौता पत्रमा हस्ताक्षर गर्दै आदन प्रदान गरेका थिए । सम्झौतासँगै लिगको सम्पूर्ण टिकट बिक्री पे वेलबाट हुनेछ ।

सम्झौतापछि पे वेलका कार्यकारी अध्यक्ष भीम प्रसाद गौतमले नेपाल सरकारको डिजिटल कन्सेप्टलाई आत्मसाथ गरेर अगाडी बढेका र एनएसएलसँग जोडिने मौका दिएकोमा धन्यवाद व्यक्त गरे । उनले टिकटको स्तरसँगै अन्य विविध विषयमा पे वेलले राम्रोसँग काम गर्ने थपे । २०१८ मा स्थापना भएको पे वेलले गत भदौमा मात्रै नेपाल सरकारबाट स्वीकृति पाएको थियो । टिकटको मूल्य पछि निर्धारण गरिने आयोजकले जनाएको छ ।

एनएसएलमा विराटनगर सिटी फुटबल क्लब, काठमाडौं रेजर्स फुटबल क्लब, ललितपुर सिटी फुटबल क्लब, एफसी चितवन, धनगढी एफसी, पोखरा थन्डर्स र बुटवल लुम्बिनी एफसी रहेका छन् ।

अखिल नेपाल फुटबल संघ (एन्फा) को प्राविधिक सहयोगमा हुने लिग राउण्ड रोबिनको आधारमा हुनेछ । लिगमा कुल १९ खेल हुनेछ । एनएसएल वैशाख ११ देखि २५ गतेसम्म एनएसएल दशरथ रंगशालामा हुनेछ ।