काठमाडौं (हाम्रो खेलकुद)– सहिद स्मारक ए डिभिजन लिगको सर्वाधिक सफल टोली मनाङ मर्स्याङ्दी क्लबको नयाँ कार्यसमितिलाई मंगलबार स्वागत गरिएको छ । अध्यक्ष मुखिया गुरुङसहित १४ सदस्यीय कार्यसमिति हालै चयन भएको थियो । नयाँ कार्यसमितिलाई स्वयम्भूस्थित क्लबको कार्यालयमा छिमी उर्केन गुरुङ अध्यक्ष रहेको पुरानो कार्यसमितिले स्वागत गरेको हो ।

क्लबको नयाँ कार्यसमितिको वरिष्ठ उपाध्यक्षमा सुशिल गुरुङ तथा उपाध्यक्षमा विजय घले, छिरिङ तासी गुरुङ, राजु गुरुङ, कमल गुरुङ र सोनाम गुरुङ छन् । महासचिवमा तेन्जिङ गुरुङ, सचिवमा कर्मा तासी गुरुङ र कोषाध्यक्षमा कर्मा गुरुङ रेहका छन् । रामबहादुर गुरुङ, मुखिया गुरुङ, कर्मा गुरुङ र सोनाम घले क्लबको सदस्य चयन भएका छन् ।

मनाङले लिगमा सर्वाधिक ८ पटक ए डिभिजन लिगको उपाधि जितेको छ । २०४२/४३ सालदेखि २०४३/४४ र २०४६ सम्म मनाङ लगातार तीन पटक च्याम्पियन बनेको थियो । त्यसपछि टोलीले २०५७, २०६०, २०६२, २०७० र २०७५ सालमा लिगको उपाधि उचालेको थियो । गत वर्ष तेस्रो स्थानमा रहँदै मनाङले लिगको अन्त्य गरेको थियो । पटक पटक एएफसी प्रेसिडेन्ट्स कपमा देशको प्रतिनिधित्व गरेको मनाङ घरेलु फुटबलको सर्वाधिक सफल टोली मध्ये एक हो ।

पुराना अध्यक्ष छिमी उर्केन गुरुङले नयाँ कार्यसमितिलाई स्वागत गर्दै आफ्नो कार्यकाल सफल रहेको बताए । ‘कोरोना महामारीका कारण पछिल्लो एक वर्ष फुटबल गतिविधि भएन । तर सामाजिक कार्यमा क्लबले निरन्तर आफ्नो उपस्थिति देखायो । फुटबलमा पनि हामीले एएफसी कपसँगै दुई मोफसल प्रतियोगिता जित्यौं । समग्रमा हार्मो कार्यकाल सफल रहयो,’ उनले भने ।

नयाँ समितिका अध्यक्ष मुखिया गुरुङले क्लबमा नयाँ समिति आएपछि अब नयाँ ढंगले क्लबलाई अगाडी बढाउन लागिपर्ने बताए । महासचिव तेन्जिङ गुरुङले पनि आफ्नो पुरानो अनुभवलाई सदुपयोग गर्दै क्लबलाई सफल बनाउन लाग्ने अभिव्यक्ति दिए ।