काठमाडौं (हाम्रो खलकुद)- नेपाल सुपर लिग (एनएसएल) का लागि फ्रेन्चाइज टोलीहरुले मार्की खेलाडी घोषणा गर्ने क्रम जारी छ ।
विराटनगर सिटी एफसीले बिहीबार मार्की खेलाडी सार्वजनिक गरेको छ ।

विराटनगरले पत्रकार सम्मेलन गर्दै राष्ट्रिय फुटबल टोली तथा मछिन्द्र क्लबका डिफेन्डर रञ्जित धिमाललाई मार्की खेलाडीमा अनुबन्ध गरेको छ।
रञ्जित नेपालले सन् २०१६ सोलिडारिटी कप जित्दाका महत्वपुर्ण खेलाडी हुन् । मच्छिन्द्रले पहिलो पटक ए डिभिजन लिग जित्दा रञ्जित टोलीका सदस्य थिए । विराटनगरका सीइओ सुभाशिश कोइरालाले सम्झौता पत्रमा हस्ताक्षर गरेका थिए ।

रञ्जितले आफ्नो गृहनगरका लागि खेल्न पाउँदा खुसी व्यक्त गरे । उनले टोलीको प्रदर्शन सुधार गर्न सक्दो प्रयास गर्ने बताए र एनएसएल फुटबल विकासमा महत्त्वपूर्ण भूमिका खेल्ने बताए । उनले अक्सनको भूमिका निकै महत्त्वपूर्ण हुने बताए ।

सीइओ कोइरालाले टोलीले प्रशिक्षक लगायत खेलाडी अनुबन्धन गर्ने निर्णयमा दीर्घकालीन रुपमा सोचेर मात्र निर्णय लिने बताए । उनले विराटनगर टोलीले स्थानीय स्तरको प्रतिनिधित्व गर्ने विश्वस्तता दिलाए ।

यसअघि बिहीबार नै फ्रेन्चाईज टोली काठमाडौ रेजर्सले मार्की खेलाडीमा राष्ट्रिय टोली तथा त्रिभुवन आर्मी फुटबल क्लवका गोलरक्षक विकेश कुथु र प्रशिक्षकमा बालगोपाल महर्जनलाई अनुबन्ध गरेको थियो । धनगढी एफसीले राष्ट्रिय टोलीका मिडफिल्डर विशाल राईलाई मार्की खेलाडी र प्रशिक्षकमा नाइजेरियाली नागरिक तोपे अयोडेजी फुजालाई नियुक्त गरेको थियो ।

राष्ट्रिय फुटबल टोली तथा मनाङ मस्र्याङ्दी क्लबका मिडफिल्डर अन्जन विष्ट ललितपुर सिटी फुटबल क्लबको मार्की खेलाडी बनेका छन्। एफसी चितवनले भने मार्की खेलाडीमा राष्ट्रिय टोलीका फरवार्ड भरत खवास र प्रशिक्षकमा मेघराज केसीलाई अनुबन्ध गरेको थियो।

एनएसएलका लागि शुक्रबार खेलाडीको अक्सन हुँदैछ । अक्सनका लागि एन्फाले १ सय ५८ खेलाडी को सुचिमा राखेको छ । जसमा ए श्रणीमा ३५, ‘बी’मा ६५ र ‘सी’मा ५८ खेलाडी रहका छन् । वैशाख ११ देखि २५ गतेसम्म हुने एनएसएलमा ७ टोलीको सहभागिता रहेछ ।