काठमाडौं (हाम्रो खलकुद)- नेपाल सुपर लिग (एनएसएल) काे फ्रेन्चाईज टोली काठमाडौ रेजर्सले राष्ट्रिय टोली तथा त्रिभुवन आर्मी फुटबल क्लबका गोलरक्षक विकेश कुथुलाई मार्की खेलाडीका रुपमा अनुबन्ध गरेको छ।

काठमाडौ रेर्जसले बिहिबार पत्रकार सम्मेलन गर्दै आफ्नो टोलीको मार्की खेलाडी र प्रशिक्षक सार्वजनिक गरेको हो। प्रशिक्षकमा राष्ट्रिय टोलीका प्रशिक्षक बालगोपाल महर्जनलाई गरेको छ । १२ औं र १३ औं दक्षिण एसियाली खेलकुद (साग) मा स्वर्ण पदक जित्दाका महत्त्वपूर्ण सदस्य विकेश आर्मीका पहिलो रोजाईका गोलरक्षक हुन् । उनीहरुको सम्झौता रकम भने सार्वजनिक गरिएन ।

१३ औं सागमा महर्जनको प्रशिक्षणमा नेपालले स्वर्ण पदक जितेको थियो। राष्ट्रिय फुटबल टोलीका पुर्व कप्तान समेत रहेका महर्जनले सन् २०१० देखि १०१६ सम्म एन्फामा प्रशिक्षकको जिम्मेवारी सम्हालेका थिए। महर्जनले भारतमा ‘बी’ डिभिजन लिगको क्लब तथा बंगलादेशमा ब्रदर्स युनियनलाई प्रशिक्षण दिएका थिए।

महर्जनले थ्री नेसन्स कप पछि मात्र काठमाडौंको टोली सम्हाल्ने जानकारी दिए । उनले एनएसएल पछि पुनः राष्ट्रिय टोलीमा फर्कने पनि बताए । यसो गर्दा राष्ट्रिय टोलीको आफ्नो जिम्मेवारीमा कुनै असर नपर्नेमहर्जनको भनाइ थियो । मार्की खेलाडी विकेशले काठमाडौंमा अनुबन्ध हुन पाउँदा खुसी व्यक्त गर्दै राम्रो प्रदर्शन गर्ने लक्ष्य राखेको बताए ।

यसअघि धनगढी एफसीले राष्ट्रिय टोलीका मिडफिल्डर विशाल राईलाई मार्की खेलाडी र प्रशिक्षकमा नाइजेरियाली नागरिक तोपे अयोडेजी फुजालाई अनुबन्ध गरेको छ । यस्तै राष्ट्रिय फुटबल टोली तथा मनाङ मस्र्याङ्दी क्लबका मिडफिल्डर अन्जन विष्ट ललितपुर सिटी फुटबल क्लबको मार्की खेलाडी बनेका छन् । एफसी चितवनले भने मार्की खेलाडीमा राष्ट्रिय टोलीका स्टाइकर भरत खवास र प्रशिक्षकमा मेघराज केसीलाई अनुबन्ध गरेको छ।

एनएसएलका लागि शुक्रबार खेलाडीको अक्सन हुँदैछ । वैशाख ११ देखि २५ गतेसम्म हुने एनएसएलमा ७ टोलीको सहभागिता रहेछ ।