काठमाडौं (हाम्रो खेलकुद)– राष्ट्रिय फुटबल टोली तथा मनाङ मस्र्याङ्दी क्लबका मिडफिल्डर अन्जन विष्ट ललितपुर सिटी फुटबल क्लबको मार्की खेलाडी घोषित भएका छन् । अर्को महिना आयोजना हुने नेपाल सुपर लिग (एनएसएल) का लागि मार्की खेलाडी घोषणा गर्ने ललितपुर दोस्रो फ्रेन्चाईज टोली हो ।

त्यसअघि सोमबार दिउँसो धनगढी एफसीले अर्का राष्ट्रिय टोलीका सदस्य विशाल राईलाई मार्की खेलाडीका रुपमा घोषणा गरेको थियो ।
अन्जनले आफू ५ लाख ५० हजार रुपैयाँमा सम्झौता गरेको बताए । भाटभटेनी सुपरमार्केटको स्वामित्व रहेको ललितपुर सिटीको तर्फबाट कल्याण गुरुङ र अनन्तले सम्झौतामा हस्ताक्षर गरेका थिए । अन्जनले अचानक सम्झौतामा पुग्ने निर्णय भएको बताए ।

‘म अर्को प्रसंगका लागि वल्र्ड ट्रेड गएको थिए । त्यहाँ उहाँहरु छलफलमा हुनुहुँदो रहेछ । अनि मसँग पनि कुरा भयो । प्रस्ताव मलाई मन पर्यो,’ उनले भने, ‘उहाँहरुले एनएसएल जित्ने गरि टोली बनाउने तयारी गर्नु भएको रहेछ। उहाँहरुको योजना मलाई ठीक लाग्यो । अनि सम्झौतामा पुग्यौं ।’

अन्जनले आफ्नो तर्फबाट शत प्रतिशत दिएर खेल्ने र टोलीको योजना सफल पार्न प्रयास गर्ने पनि बताए । ‘मार्की खेलाडी चुनिनु जति खुसीको विषय हो त्यत्तिकै चुनौती पनि हुन सक्छ’, उनले भने, ‘आफैंले लिड गरेर टोलीलाई सफलता दिलाउन सकियो भने सफल भएको हुनेछ ।’

पाँच वर्षयता नेपाली टोलीका नियमित सदस्य रहेका अन्जन नेपाली टोलीका नियमित सदस्य हुन् । नेपाली टोलीले पछिल्ला केहि वर्ष प्राप्त गरेको ठूला सफलतामध्ये १३ औं दक्षिण एसियाली खेलकुद (साग) को स्वर्ण बाहेक सबैमा उनी समावेश छन् । साफ यू १९ को उपाधि जित्दाका महत्वपूर्ण सदस्य रहेको अन्जनले १२ औं साग, बंगबन्धु गोल्डकप, एएफसी सोलिडारिटी कप जितेका थिए । विश्व कप छनोटमा नेपालले एक मात्र खेलमा चाइनिज ताइपेलाई हराउँदै दुवै गोल अन्जनले नै गरेका थिए ।

एनएसएलका सहभागी ७ टोलीले १/१ खेलाडीलाई मार्की खेलाडी राख्ने प्रावधान छ । नेपाल स्पोर्टस् एण्ड इभेन्ट्स म्यानेजमेन्टको आयोजना तथा अखिल नेपाल फुटबल संघ (एन्फा)को प्राविधिक सहयोगमा वैशाख ११ देखि २५ गते सम्म एनएसएल दशरथ रंगशालामा हुनेछ ।