टोकियो (एजेन्सी) – रसिया विश्वकपका लागि जारी एसियाली छनोटमा बिहीबार दक्षिण कोरिया, जापान, युएइ, इरान र सिरिया विजयी भएका छन् ।

समूह एमा फरवार्ड सन ह्युग मिनको निर्णायक गोलमा दक्षिण कोरियाले कतारलाई ३–२ ले हरायो । सोही समूहको अर्को खेलमा सनसनीपूर्ण नतिजा निकाल्ने क्रममा सिरियाले चीनलाई १–० नै हरायो । इरानले उज्वेकिस्तानलाई १–० ले पराजित गर्यो । अर्को समूहमा जापानले इराकमाथि २–१ र युइएले थाइल्यान्डमाथि १–० संघर्षपूर्ण नतिजा निकालेको छ । सिरियाका ममुद अल मावाले ५४ औं मिनेट गरेको गोलमा चीन पराजित भएको थियो । समूह एमा इरान र दक्षिण कोरियाको समान ७ अंक छ । गोलअन्तरमा इरान शीर्षस्थानमा छ । ६ अंकसहित उज्वेकिस्तान तेस्रो स्थानमा छ । त्यस्तै सिरियाको ४, चीनको १ र कतार अंक बिहिन छ ।

समूह बीमा एक खेल कम खेलेका अस्ट्रलिया र साउदी अरेबिया तथा ३ खेल खेलेका जापान र युएइको समान ६ अंक छ । इराक र थाइल्यान्ड अंक विहिन छन् । समूहका सबै टोलीले एकअर्कासँग होम एन्ड अवे खेलेपछि समूह ए र बीका शीर्ष दुई टोली विश्वकपका छनोट हुनेछन् । तेस्रो स्थानमा रहने दुई टोलीले प्ले अफ खेल्नेछन् ।

होतारु यामागुचीले इन्जुरी समयको पाँचौं मिनेटमा गोल गरेपछि जापाले इराकमाथि २–१ को जित हासिल गरेको थियो । गुन्की हारागुचीले २५ औं मिनेटमा गोल गर्दै जापानलाई घरेलु टोलीमा अग्रता दिलाएका थिए । ६० औं मिनेटमा साद नातिक नाजीले फ्रिकिकमार्फत गोल फर्काउदै खेललाई १–१ को बराबरीमा पुर्याए । ६ मिनेट थपिएको इन्जुरी समयमा यामागुचीले गोल गर्दै जापानलाई जित दिलाए । पहिलो हाफमा २–१ ले पछि परेको खेल लाई उल्टाउँदै कोरिया विजयी भएको थियो । जी डोङ वनले ५६ औं मिनेटमा गोल फर्काउँदै खेललाई २–२ को बराबरीमा पु¥याएका थिए । त्यसको दुई मिनेटपछि नै ह्युग मिनले निर्णायक गोल गरे । अन्तिम २४ मिनेट कोरियाले दस खेलाडीमा सिमित भएको थियो । होङ जियोङ हो ६६ औं मिनेटमा दोहोरो पहेलो कार्ड पाउँदै मैदान छोडेका थिए । कप्तान कि सुङ युइङले ११ औं मिनेटमा गोल गर्दै कोरियालाई अघि बढाएपनि १७ औं मिनेटमा नै हसन अलि हाइडोसले पेनाल्टीमा बराबरी गोल गरे । सेबास्टियन सोरियालाई होङले फाउल हानेपछि कतारले पेनाल्टी पाएको हो ।

मध्यान्तर हुन केहि समय बाँकी रहँदा सारियोले गोल गर्दै कतारलाई अग्रता दिलाए । दोस्रो हाफमा जीले बराबरी गोल गरे । सनले टोलीका लागि निर्णायक गोल गर्दै महत्वपूर्ण अंक दिलाएका थिए । तीन खेलमा अपराजित रहँदै आएको दक्षिण कोरियाले दुई जित र १ खेलमा बराबरी गरेको छ ।