काठमाडौं (हाम्रो खेलकुद)– राष्ट्रिय महिला टोलीकी फरवार्ड सावित्रा भण्डारी घुँडाको गम्भीर चोट बोकेपछि झन्डै एक वर्ष मैदानबाहिर रहने भएकी छिन् ।

सोमबार विभागिय टोली नेपाल पुलिस क्लबसँगको खेलमा सावित्रा घाइते भएकी थिइन् । दायाँ घुँडामा चोट लागेपछि बिएन्डबीमा एमआरआई गरेकी उनको रिपोर्ट मंगलबार आएको हो । रिपोर्टको प्रारम्भिक अध्ययनले घुँडाको एन्टेरिएर क्रुसिएट लिगामेन्ट (एसिएल) च्यातिएको र अन्य चोट पनि देखिएको छ । अब विशेषज्ञसँग रिपोर्ट देखाएपछि चोटको विस्तृत विवरण आउनेछ ।

पुलिसविरुद्ध खेलको ७९ औं मिनेटमा सम्बाले मैदान छाडेकी थिइन् । उनको ठाँउमा मैदान प्रवेश गरेकी रविना गोलेले ८६ औं मिनेटमा गोल गर्दै एएिफलाई जित दिलाएकी थिइन् । साम्बाले गोलको लागि प्रयास गर्दा चोट लागेको थियो । विपक्षी गोलकिपर अघि बढेको मौकामा बल चिप गर्ने प्रयासमा ल्यान्डिङका क्रममा उनको घुडाँमा चोट लागेको थियो ।

लिगको १० खेलमा साम्बाले ४३ गोल गरिसकेकी छिन् । एपिएफलाई लिग च्याम्पियन बन्न अब विराटनगर विरुद्ध जित हासिल गरे पुग्नेछ । लिगको अन्तिम खेल शुक्रबार आर्मी र एपिएफबीच हुनेछ ।

गम्भीर चोट लागेकी साम्बाको अब शल्यक्रिया गर्नुपर्ने हुन्छ । यसबारे विस्तृत रिपोर्ट अध्ययनपछि एन्फाले निर्णय लिनेछ । अघिल्लो महिना पुरुष राष्ट्रिय टोलीको बन्द प्रशिक्षणमा सहभागी विमल घर्ती मगरको पनि यसै प्रकृतिको चोट लागेको थियो । उनी शल्यक्रियाका लागि कतार पुगिसकेका छन् ।