काठमाडौं (हाम्रो खेलकुद) – नेपाली राष्ट्रिय फुटबल टोलीका मुख्य प्रशिक्षक योहान कालिनले पदबाट राजिनामा दिएका छन् । कालिनले नोभेम्बर १ मा बुझाएको राजिनामा एन्फा कार्यसमितिको बिहीबार बसेको बैठकले स्वीकृत गरेको हो ।

कालिन सन् २०१९ मार्चमा नेपालको प्रशिक्षक नियुक्त भएका थिए । कालिनको नेतृत्वमा नेपालले १२ खेल खेल्दा १ जित, ३ बराबर र ८ हारको नतिजा निकालेको थियो । उनको प्रशिक्षणमा नेपालले सबै खेल आफूभन्दा माथिल्लो वरियतामा रहेको टोलीसँग खेलेको थियो ।

कालिन हाल स्वीडेनमा रहेको र त्यहाँबाट सरकारले युरोपबाहिर जान प्रतिबन्ध लगाएका कारण उनी पछिल्लो महिना भएको मैत्रीपूर्ण खेलको तयारीमा आउन पाएका थिएनन् । एन्फाले त्यसपछि उनीसँग छलफल गर्दा दुवै पक्षले सम्झौता रद्द गर्नु नै उचित निर्णय हुने बुझेका थिए । फेब्रुअरी अन्तिमसम्म करार सम्झौता रहेपनि सहमतिमा पद छाडेपछि एन्फाले सेप्टेम्बरसम्म पूर्ण तलब दिंदै कालिनलाई बिदा गरेको छ ।

कालिनको नेतृत्वमा नेपालले विश्वकप छनोटको ५ खेलमा १ जित र ४ हारको नतिजा निकालेको थियो । त्यसबाहेक नेपालले मैत्रीपूर्ण खेलमा पनि औसत नतिजा निकाल्दै आएको थियो । सन् २०२० मा हुने तय भएको साफ च्याम्पियनसिपलाई लक्षित गर्दै कालिनको आगमन भएपनि कोरोना संक्रमणका कारण उक्त प्रतियोगिता सरेको थियो । कालिनको नेतृत्वमा नेपालले दक्षिण एसियाको कुनै टोलीसँग पनि खेलेन ।

कालिनको प्रस्थानसँगै एन्फाले हाललाई कार्यवाहक प्रशिक्षकको जिम्मेवारी बालगोपाल महर्जनलाई सुम्पिएको छ । एन्फाले मुख्य प्रशिक्षकमा विदेशी प्रशिक्षक नियुक्त गर्नुको विकल्प भने छैन । मुख्य प्रशिक्षकले कम्तिमा प्रो लाइसेन्स प्राप्त गरेको हुनुपर्नेमा नेपालमा कुनै प्रशिक्षकसँग पनि सो योग्यता नभएका कारण विदेशी प्रशिक्षक नियुक्ति प्रक्रिया चाडैं सुरु हुनेछ ।