एजेन्सी – जर्मन बुन्डेस लिगामा शीर्षस्थानमा रहेको बायर्न म्युनिखले जित दर्ता गर्दा बोरुसिया डर्टमुन्डले हार बेहोरेको छ ।

बायर्नले भिएफबी स्टुटगार्टमाथि उसकै मैदानमा ३–१ को पूनरागमन जित निकालेको हो । बायर्नको जितमा किङ्सले कोमान, रोबर्ट लेवान्डोस्की र डगलस कोस्टाले गोल गरे । घरेलु टोलीका टांगे कोउलीवालीले गरेको गोल सान्त्वना बन्यो ।

शनिबार राति भएको खेलको २०औं मिनेटमा कोउलीवालीले गोल गर्दै घरेलु टोलीलाई १–० को अग्रता दिलाएका थिए । उनले सिलास वामाङगीटुका फुन्डुको पासमा गोल गरेका थिए । ३८औं मिनेटमा किङ्सले कोमाले गोल गरेपछि बायर्न खेलमा फर्किएको थियो । उनले थोमस मुलरको पासमा गोल गरेका थिए ।

लगत्तै ३९औंमिनेटमा फिलिप फोर्सटरले गोल गरेपनि भिएआरबाट मान्यता नपाउदा स्टुटगार्ट पुनः अग्रता लिनबाट चुक्यो । पहिलो हाफको इन्ज्युरी समयको थप गरिएको पहिलो मिनेटमा कोमानको पासमा रोबर्ट लेवान्डोस्कीले गोल गर्दै बायर्नलाई खेलमा २–१ को अग्रता दिलाए ।

८७औं मिनेटमा लिरोए सानेको पासमा सब्सिच्युट डगलस कोस्टाले गोल गर्दै बायर्नको जित पक्का गरे । कोस्टा ६९औं मिनेटमा कोमानको स्थानमा मैदान छिरेका थिए । यो जितसँगै बायर्न ९ खेलबाट २२ अंक जोडेर शीर्षस्थानमा यथावत रहेको छ । पराजित स्टुटगार्ट ११ अंकसहित १०औं स्थानमा छ ।

बुन्डेसलिगाकै अर्काे खेलमा बोरुसिया डर्टमुन्ड घरेलु मैदानमा एफसी कोल्नसँग २–१ ले स्तब्ध बनेको छ । डर्टमुन्डलाई स्तब्ध बनाउन कोल्नका इलयसले दुई गोल गरे । इलयसले नवौं र ६०औं मिनेटमा गोल गरेका थिए ।

थोर्गन हाजार्डले ७४औं मिनेटमा गोल गरेपनि डर्टमुन्डको हार टरेन । यो हारले डर्टमुन्ड १८ अंक जोडेर तेस्रा स्थानमा झर्दा कोल्न ६ अंकसहित १५औं स्थानमा उक्लिएको छ ।

अन्य नतिजा
अग्सवर्गविरुद्ध फ्रेइवर्ग (१–१), आरबी लाइप्जिगविरुद्ध अर्मेनिया बिलेफिल्ड (२–१), युनियन बर्लिनविरुद्ध फ्रान्कफर्ट (३–३), बोरुसिया मोन्चेनग्लाडवाकविरुद्ध साल्के (४–१)