एजेन्सी – बार्सिलोनाको जति बेला प्रसंग चल्छ त्यहाँ लिओनल मेस्सीको चर्चा स्वभाविक रुपमा हुन्छ नै । ला लिगामा शनिबार बार्सिलोनाको जितमा मेस्सी नै केन्द्रमा रहे ।

पहिलो रोजाईमा नपरेका मेस्सी दोस्रो हाफमा केन्द्रमा रहेका थिए । उनले उच्च प्रदर्शनबाट प्रेरित टोलीले रियल बेटिसलाई ५–२ ले हराएको थियो । जबकी मेस्सी विना पहिलो हाफ १–१ को बराबरीमा थियो ।

बेटिससँगको खेल अघि बार्सिलोनाले ४ खेलमा जित हासिल गर्न सकेको थिएन । जहाँ मेस्सीको प्रदर्शन पनि कमजोर भएको हो कि भन्ने शंका गरिएको थियो । शनिबार मेस्सीले समर्थकको एउटा प्रशंसाले उनी मुस्कुराएका थिए ।

यो सिजन ला लिगामा बार्सिलोनाको सुरुवात सन्तोषजनक हुन सकेको थिएन । मेस्सीकै खेल जीवनका बारेमा पनि व्यापक चर्चा भएको थियो । सिजनको सुरुवातमा उनी क्लब छाड्न चाहन्थे । तर, क्लब त्यसका लागि तयार भएन ।

क्लबसँग विवादमा जानु भन्दा कम्तीमा यो सिजनको अन्त्यसम्म बार्सिलोनामै रहने मेस्सीले निर्णय गरेपनि तत्कालको विवाद टरेको थियो । बेटिसविरुद्धको खेलमा उनले २ गोल गरे । त्यसअघिका  खेलमा भने यो सिजन उनले क्षमता अनुसारको प्रदर्शन गर्न नसकेको आरोप लागेको छ ।

बेटिससँगको उत्कृष्ट खेलपछि कार निकाल्ने क्रममा समर्थकले प्रशंसा गर्दा उनी खुसी देखिएका थिए । समर्थकले भने, ‘मलाई तिमी मनपर्छ । म तिमीलाई आफ्नो बुबालाई भन्दा बढी माया गर्छु,’ अनि मेस्सी मुस्कुराए ।