एजेन्सी – जर्मन च्याम्पियन बायर्न म्युनिखले यूईएफए च्याम्पियन्स लिगमा आफ्नो जितको सिलसिलालाई कायम राख्दै लगातार १३ औं खेलमा जित हासिल गरेको छ । बायर्नले मंगलबार लोकोमोटिभ मस्कोलाई २-१ ले पराजित गरेको हो ।

बायर्नले खेलको १३ औं मिनेटमा लिओन गोरेट्जकाको गोलमा अग्रता लिएको थियो । बेन्जामिन पाभार्डको भली क्रसलाई उनले हेडरमार्फत गोल गरे । किंग्सले कोमानको प्रहार पोस्टमा लागेर फर्कंदा बायर्नले अग्रता दोब्बर पार्न सकेन ।

दोस्रो हाफको ७० औं मिनेटमा मेन्डेस आन्द्रादेको पासमा एन्टोन मिरान्चुकले गोल गर्दै खेल बराबरीमा ल्याए । तर त्यसको दश मिनेट नबित्दै बायर्नले पुन: अग्रता लियो । ७९ औं मिनेटमा जोशुवा किमिखले गोल गर्दै बायर्नको अग्रता पुन: स्थापना गरे । उनले मार्टिनेजको पासलाई उत्कृष्ट नियन्त्रणमा लिँदै टर्न गरेपछि प्रहार गरेको भली गोलमा परिणत भएको थियो ।

त्यसअघि रोबर्ट लेवान्डोस्कीले पेनाल्टी प्राप्त गरेपनि भिडियो असिस्टेन्ट रेफ्रीले त्यसलाई अफसाइडको मान्यता दिएपछि बायर्नले अन्तिम समयसम्म कुर्नुपरेको हो । घरेलु टोलीको समर्थनमा रंगशालामा केहि हजारको संख्यामा दर्शकको समेत उपस्थिति रहेको थियो ।

यस समूहको अर्को खेलमा एटलेटिको म्याड्रिडले रेड बुल साल्जबर्गलाई ३-२ ले पराजित गर्यो । बायर्न २ खेलमा ६ अंकसहित शीर्षस्थानमा छ । एटलेटिको ३ अंकसहित दोस्रो स्थानमा रहँदा मस्को र साल्जबर्गको १-१ अंक रहेको छ ।

यो पनि : हारबाट जोगिएको रियल म्याड्रिड पुछारमै