काठमाडौं (हाम्रो खेलकुद)– अखिल नेपाल फुटबल संघ (एन्फा) ले सञ्चालन गर्दै आएको एन्फा एकेडेमीको होस्टलमा राखिएको क्वारेन्टिनका ३ जनालाई कोरोना संक्रमण देखिएको छ । ललितपुर महानगरपालिकाका प्रवक्ता राजु महर्जनले ३ जनामा कोरोना पोजेटिभ देखिएको बताएका छन् ।

एन्फाले सातदोबाटोस्थित केन्द्रिय कार्यालय परिसरको एकेडेमी, धरान र बुटवलको टेक्निकल सेन्टर तथा रौतहतको निर्माणधिन महिला एकेडेमी पनि क्वारेन्टिनका रुपमा प्रयोग गर्न दिँदै आएको छ । सातदोबाटोको एकेडेमी भने एन्फाले ललितपुर महानगरपालिकाका लागि प्रयोग गर्न दिएको थियो ।

एन्फाले त्यसबाहेक दुई वटा एम्बुलेसन पनि ललितपुर महानगरलाई उपलब्ध गराएको छ । एकेडेमीमा भने संक्रमितसँग सम्पर्कमा आएर संक्रमण सम्भावना भएकालाई राखिंदै आएको थियो ।

एन्फाले लकडाउन खुकुलो भएसँगै संघको दैनिक काम पनि सुचारु गरेको छ । यद्यपि एकेडेमीको होस्टेल र केन्द्रिय कार्यालयमा आवतजावत भने लामो समयदेखि बन्द गरिएको छ । एकेडेमी प्रवेशका लागि छुट्टै गेट राखिएको छ । कोरोना संक्रमण देखिएपछि एन्फाको नियमित कार्यालय र राष्ट्रिय टोलीको प्रशिक्षणमा पनि असर देखिने सम्भावना छ ।

एन्फाले विश्व कप छनोटको लागि तयारीका लागि राष्ट्रिय खेलकुद परिषद् (राखेप) मार्फत सरकारी निकायमा पत्राचार गरिरहँदा एकेडेमीमै संक्रमण देखिएको हो । एन्फा महासचिव इन्द्रमान तुलाधरले सरकार र विश्व स्वास्थ्य संगठनले दिएको मापदण्ड पुरा गरेर मात्र प्रशिक्षण सुरु गरिने भएकाले त्यसमा एन्फा सतर्क रहेको बताएका छन् ।