एजेन्सी – लोनमा सेल्टा डि भिगोबाट खेलिरहेका क्याटलान क्लब बार्सिलोनाका ब्राजिली मिडफिल्डर राफिन्हा चम्कदा सेल्टा डि भिगोले स्पेनिस ला लिगामा डिपोर्टिभो एलाभेसमाथि सानदार जित निकालेको छ ।

घरेलु मैदानमा १० खेलाडीमा समेटिएको एलाभेसमाथि सेल्टाले ६–० को सानदार जित निकालेको हो । सेल्टाको जितमा राफिन्हाले दुई तथा जेइसन मुरिल्लो, इएगो आस्पास, नोलिटो र सान्टी मिनाले समान एक गोल गरे । पहिलो हाफमा ४ तथा दोस्रो हाफमा दुई गोल सम्भव भएको थियो ।

खेलको १४ औं मिनेटमा सेल्टाले जेसन मुरिलोको गोलमा अग्रता लिएको थियो । उनले डेनिस सुआरेजको क्रसलाई हेडरमार्फत गोलमा परिणत गरेका थिए । २० औं मिनेटमा इआगो आस्पासले पेनाल्टीमार्फत गोल गर्दै अग्रता दोब्बर पारे । डिफेन्डर जुबोमिर फेज्साले पेनाल्टी क्षेत्रभित्र ह्यान्ड गरेपछि रेफ्रीले पेनाल्टी दिएका थिए । २७ औं मिनेटमा डिफेन्डर मार्टिन अगिरेगबिरियाले रातो कार्ड पाएपछि अलाभेस १० खेलाडीमा समेटियो ।

बार्सिलोनाबाट लोनमा आएका राफिन्हा आलाकान्टराले दुई मिनेटको अन्तरमा दुई गोल गरेपछि घरेलु टोलीले पहिलो हाफमा नै ४-० को अग्रता बनायो । ४० औं मिनेटमा डेनिस सुआरेजको पासमा गोल गर्दै राफिन्हाले सेल्टालाई ३-० ले अगाडी बढाएका थिए । लगत्तै पेनाल्टी क्षेत्रभित्रबाट गरेको प्रहार गोलरक्षक रोबर्टोले बचाउन नसक्दा राफिन्हाले व्यक्तिगत दोस्रो गोल दर्ता गरे ।

७८ औं मिनेटमा डिएगो नोलिटोले पेनाल्टीमार्फत गोल गर्दै सेल्टालाई ५-० ले अगाडी बढाए । केभिन भाज्केजलाई पेनाल्टी क्षेत्रमा लडाएपछि रेफ्रीले पेनाल्टी दिएका थिए । ८६ औं मिनेटमा सान्टि मिनाले गोल गर्दै फराकिलो जित सुनिश्चित गरे । उनले नोलिटोको थ्रु बललाई गोलमा परिणत गरेका थिए ।

यस जितले सेल्टाले रेलिगेसन क्षेत्रको डरबाट केहि राहत पाएको छ । सेल्टा ३० खेलमा ३० अंक जोड्दै १६ औं स्थानमा छ । अलाभेस भने ३० खेलमा ३५ अंकसाथ १३ औं स्थानमा रहेको छ ।

आज राति नै ला लिगाको दोस्रो स्थानमा रहेको रियल म्याड्रिडले रियल सोसिडाडको सामना गर्दैछ । सोसिडाडमाथि जित निकाल्न सके रियलले शीर्षस्थानको बार्सिलोनासँग अंक बराबरी गर्दै शीर्षस्थानमा उक्लनेछ । रियलले बार्सिलोनालाई ‘हेड टु हेड’ मा पछि पार्नेछ ।