एजेन्सी – लन्डन क्लब आर्सनल इंग्लिस प्रिमियर लिगमा ब्राइटन होव अल्वियोनसँग स्तब्ध बनेको छ । आसर्नलले शुरुवाती अग्रता लिएर पनि जोगाउन नसक्दा ब्राइटनसँग २–१ ले स्तब्ध बन्न पुगेको हो ।

दि अमेरिकन एक्प्रेस कम्युनिटी स्टेडियम फाल्मेरमा शनिबार राति भएको खेलमा आसर्नललाई स्तब्ध बनाउन लेविस डन्क र निल मोउपेले गोल गरे । आसर्नलका निकोलस पेपेले गरेको गोल सान्त्वना बन्यो ।

बल पोजेसनमा पकड बनाउदै घरेलु टोलीलाई दवावमा राखेपनि आर्सनलले गोलको लागि दोस्रो हाफ नै कुर्नुपरेको थियो । ६८औं मिनेटमा बुकायो साकाको पासमा निकोलस पेपेले गोल गर्दै आर्सनललाई अग्रता दिलाएका थिए ।

तर, आर्सनलको त्यो अग्रता लामो समय टिकेन । ७५औं मिनेटमा लेविस डन्कले गोल गर्दै खेललाई १–१ गोलको बराबरीमा ल्याए । बराबरीतर्फ धकेलिएको खेलको इन्ज्युरी समयो थप गरिएको पाँचौ मिनेटमा निल मोउपेले गोल गर्दै ब्राइटनलाई २–१ को जित दिलाउदै महत्वपुर्ण ३ अंक लिन सफल भए ।

कोरोनापछि आसर्नलको यो लगातार दोस्रो हार हो । यसअघि आर्सनल म्यानचेस्टर सिटीसँग ३–० ले पराजित भएको थियो । जितसँगै ब्राइटन ३० खेलबाट ३२ अंक जोडेर १५औं स्थानमा उक्लदा आर्सनल ४० अंक जोडेर १०औं स्थानमा झरेको छ ।

यस्तै प्रिमियर लिगको अर्काे खेलमा वल्भ्सले वेस्टह्याममाथि २–० को सहज जित निकाल्दै पाँचौ स्थनमा रहेको म्यानचेस्टर युनाइटेडसँग अंक बराबरी गरेको छ । समान ४६ अंक भएपनि वल्भ्स गोल अन्तरमा छैटौ स्थानमा रहेको हो । हारपछि वेस्टह्याम २७ अंक जोडर १७औं स्थानमा यथावत छ । वल्भ्सको सहज जितमा राहुल जिमिनेज र पेड्रो नेटोले गोल गरे । दुवै गोल दोस्रो हाफमा सम्भव भएको थियो ।

यस्तै अर्काे खेलमा क्रिस्टल प्यालेसले एफसी बर्नमाउथमाथि २–० को जित निकालेको छ । बर्नमाउथको जितमा मिलिभोजेभिक र जोर्डन एयुले गोल गरे । जितसँगै प्यालेस ४२ अंक जोडेर नवौं स्थानमा उक्लन सफल हुदा बर्नमाउथ २७ अंक जोडेर रेलिग्सन जोनको १८औं स्थानमा यथावत छ ।