एजेन्सी – स्पेनिस ला लिगामा आज (मंगलबार) राति तीन खेल हुँदैछ । शीर्षस्थामा रहेको क्याटलान क्लब बार्सिलोनाले घरेलु मैदानमा रेलिगेसन क्षेत्रमा रहेको लेगानेसको सामना गर्दैछ ।

खेल नेपाली समय अनुसार राति १ः४५ बजेपछि हुनेछ । घरेलु मैदानमा बार्सिलोना सहज जित निकाल्दै शीर्ष स्थानको अग्रता फराकिलो बनाउने योजनामा हुनेछ । अघिल्लो खेलमा मालोर्कामाथि ४–० को सहज जित निकालेको बार्सिलोना सोही जितलाई निरन्तरता दिने लक्ष्यका साथ मैदान उत्रनेछ ।

शीर्षस्थानमा रहेको बार्सिलोनाको २८ खेलमा ६१ अंक छ । लेगानेसलाई पराजित गरे बार्सिलोनाले दोस्रो स्थानको रियल म्याड्रिडलाई ५ अंकले पछि पार्नेछ । रियलले बिहीबार राति घरेलु मैदानमा भ्यालेन्सियासँग खेल्दैछ । रियलको ५९ अंक रहेको छ ।

टोलीका सबै खेलाडीहरु कप्तान लियोनेल मेस्सी, लुइस सुआरेज, एन्टोइन ग्रिजमन, इभान राकिटिच, मार्टिन ब्रेथवेट र जेरार्ड पिके पुर्ण रुपमा फिट रहँदा क्लेमेन्ट लेङ्लेटले टोलीमा पूनरागमन गर्न सक्छन् । चोटका कारण मिडफिल्डर फ्रान्की डि जोङले खेल्ने सम्भावना न्यून छ । प्रशिक्षक सेटिनले थकान महसुस हुन नदिन अघिल्लो खेलबाट केहि परिवर्तन गर्ने बताएका छन् ।

यता, लेगानेस बार्सिलोनासँग कम्तीमा पनि अंक खोस्ने रणनीतिमा हुनेछ । लेगानेस २३ अंक जोडेर पुछारबाट दोस्रो स्थानमा छ । यि दुई टोलीको पछिल्लो १० खेलको नतिजा हेर्दा बार्सिलोनाले ९ खेलमा जित हात पार्दा लेगानेसले १ खेलमा जित निकालेको छ ।

लेगानेसले सन् २०१८ को ला लिगामा बार्सिलोनालाई २–१ ले पराजित गरेको थियो । गत जनवरीमा भएको कोपा डेल रेमा बार्सिलोनाले लेगानेसलाई ५–० को फराकिलो अन्तरले पराजित गरेको थियो । ला लिगा अन्तर्गत अन्य खेलमा गेटाफेले एस्पान्योलसँग तथा भिल्लारियलले रियल मालोर्कासँग खेल्नेछ ।