एजेन्सी – जर्मन बुन्डेसलिगामा आजदेखि ३२औं चरणको खेलहरु सुचारु हुँदैछ । शीर्षस्थानको बायर्न म्युनिखको खेलसँगै आज राति चार खेल हुनेछ । लिग लिडर बायर्नले वेर्डर ब्रेमेनको भ्रमण गर्दैछ ।

खेल ब्रेमेनको मैदानमा राति १२ः१५ बजे हुनेछ ।  यो महत्त्वपूर्ण खेलमा जित हात पार्दै बायर्न दुई खेल अगावै लगातार आठौं सिजन बुन्डेसलिगा च्याम्पियन बन्नेछ । बुन्डेस लिगामा तीन चरणको खेल बाँकी रहँदा बायर्नले दोस्रो स्थानको बोरुसिया डर्टमुन्डलाई ७ अंकले पछि पारेको छ ।

बराबरी या हारले बायर्नले उपाधिको लागि अर्काे खेल अथवा डर्टमुन्डको खेल कुर्नुपर्ने हुन्छ । त्यसैले बायर्न कुनै गल्ती नगर्दै ब्रेमेनलाई पराजित गर्ने लक्ष्यमा मैदान उत्रिनेछ । बायर्न २०१२/१३ को सिजनदेखि लगातार च्याम्पियन बन्दै आएको छ । सर्वाधिक २८ पटक बुन्डेसलिगा जितेको बायर्न मंगलबार राति उपाधि आफ्नो बनाउन चाहन्छ ।

कोरोना भाइरसले स्थगित लिग सुचारुपछि अपराजितर रहेको बायर्नका लागि बुधबार स्टार खेलाडीद्धय रोवर्ट लेवान्डोस्की र थोमस मुलर उपलब्ध हुनेछन् । उनीहरु दोहोरो पहेंलो कार्डका कारण अघिल्लो खेलमा प्रतिबन्धमा रहेका थिए।  यता, ब्रेमेन घरेलु मैदानमा बायर्नविरुद्ध अप्रत्यासित जित निकाल्दै रेलिगेसन क्षेत्रबाट माथि उक्लन चाहन्छ । पुछारबाट दोस्रो स्थानमा रहेको ब्रेमेनको २८ अंक छ ।

बुन्डेसलिगाको अन्य खेलमा बोरुसिया मुन्चेनग्लाडवाकले वल्फ्सवर्गसँग, फ्राइबर्गले हर्था बर्लिनको तथा युनियन बर्लिनले पाडेरवर्नको सामना गर्दैछ ।