एजेन्सी – रियल म्याड्रिडका मिडफिल्डर एवं सन् २०१८ का ब्यालोन डी’ओर विजेता लुका मोड्रीचले आफ्नो खेलाडी करीअर रियल म्याड्रिडमै रहेर अन्त्य गर्न चाहेको बताएका छन् ।

क्रोएसियाको राष्ट्रिय फुटबल टोलीका कप्तान समेत रहेका मोड्रीचले इटालियन संचारमाध्यम गजेटा देलो स्पोर्टसँग अन्तर्वार्ताका क्रममा यस्तो अभिव्यक्ति दिएका हुन् । मोड्रीचको हाल रियलसँगको सम्झौता सन् २०२१ सम्म रहेको छ । रियलले बढ्दो उमेरका खेलाडीलाई पछिल्लो समय हरेक वर्ष सम्झौता नविकरण गर्ने प्रणाली अपनाएको छ ।

‘ मलाई लाग्छ म अझै २ वर्ष उच्च स्तरको फुटबल खेल्न सक्छु । त्यसपछि मात्र म के गर्ने भन्ने निर्णय लिन्छु,’ मोड्रीचले भने, ‘म आफ्नो करीअर रियालमा नै अन्त्य गर्न चाहन्छु । यसबारे क्लबको के अवस्था रहन्छ, त्यसले धेरै फरक पर्छ । खेलाडी जीवनपछि भने म प्रशिक्षकका रुपमा अगाडी बढ्नेछु ।’

यस्तै मोड्रीचले फ्रान्सका युवा फरवार्ड किलियन एमबाप्पेको भविष्यका बारेमा पनि टिप्पणी गरेका छन् । ‘एमबाप्पेसँग सबै गुण छ । तर आफ्नो स्तर अझै माथि लग्न उनले अर्को लिगमा खेल्नुपर्छ । उनले आफ्नो टिम सहजै जित्ने लिग खेलेर धेरै सिक्दैनन्,’ ३४ वर्षीय मिडफिल्डरले भने ।

मोड्रीचले बजारमा आउन लागेको आत्मकथाको प्रचार गर्ने क्रममा अन्तर्वार्ता दिएका थिए । यसअघि उनले आफ्नो आत्मकथामा नै रोनाल्डो र मोउरिन्होबीच झगडा परेको घटनाबारे बोलेका थिए ।