एजेन्सी – फ्रान्सेली प्रशिक्षक जिनेदिन जिदानले स्पेनिस क्लब रियल म्याड्रिडको प्रशिक्षकको भूमिकामा २ सय खेल पूरा गरेका छन् ।

आइतबार एइबारविरुद्ध खेल रियलमा जिदानको प्रशिक्षकका रुपमा २ सयौं खेल थियो । जिदानले सन् २०१६ जनवरीमा पहिलो पटक रियल म्याड्रिड प्रशिक्षकको रुपमा जिम्मेवारी लिएका थिए । त्यस खेलमा रियलले डेपोर्टिभोलाई ५-० ले पराजित गरेको थियो । जिदानले त्यसयता १ सय ९९ खेलमा प्रशिक्षण दिएका छन् ।

उनले ला लिगामा १ सय ३५, च्याम्पियन्स लिगमा ४०, कोपा डेल रे मा १५, क्लब विश्वकप र स्पेनिस सुपर कपमा ४-४ तथा युरोपेली सुपर कपमा २ खेल प्रशिक्षण दिएका छन् । यसक्रममा जिदानले १ सय ३१ जित (६५ प्रतिशत), ४२ बराबरी र २६ हार बेहोरेका छन् ।

रियलले बेहोरेका २६ हारमध्य १७ हार लिगमा छन् । रियल बेटिसले सर्वाधिक तीन पटक जिदानको टोलीलाई पराजित गरेको छ । च्याम्पियन्स लिगमा ६ पटक हार बेहोरेको रियलले कोपा डेल रेमा तीन खेल हारेको छ । संयोगवश कोपा डेल रेमा रियलले लेगानेस, सेल्टा र रियल सोसीडाड तीनै टोलीसँग सान्टियागो बर्नाबाउमा पराजय भोगेको थियो ।

जिदानको नेतृत्वमा रियल म्याड्रिडले प्रति खेल २.४ को औसतमा ४ सय ८९ गोल गरेको छ । यस्तै प्रति खेल १.०५ को औसतमा २ सय १० गोल खाएको पनि छ । जिदानको नेतृत्वमा रियलले क्लब विश्वकपमा अपराजित यात्रा कायम गरेको छ । स्पेनिस सुपर कपमा तीन जित र १ बराबरी खेलेको रियलले युरोपेली सुपरकपमा भने दुवै खेल जितेको छ ।

जिदान रियल म्याड्रिडमा प्रशिक्षकका रुपमा २ सय खेल पार गर्ने तेस्रो प्रशिक्षक बनेका छन् । यसअघि मिगुएल म्युनोजले रियलमा ६ सय ५ खेलमा प्रशिक्षण दिँदै ३ सय ५७ खेल (५९%) जितेका थिए । भिसेन्टे डेल बोस्केले २ सय ४६ खेलमा १ सय ३३ खेल (५४%) जिताएका थिए ।

सुरुवाती २ सय खेलको तुलना गर्ने हो भने जिदान सबैभन्दा कम हार बेहोर्ने प्रशिक्षकमा पर्दछन् । जिदानले २६ खेल हार्दा म्युनोज ३३ र डेल बोस्केले ४८ खेल हारेका थिए । जितको तुलना गर्दा भने म्युनोजले १ सय ४४ खेल जित्दा जिदानले १ सय ३१ खेल जितेका छन् ।

जिदानले हालसम्म रियललाई १० उपाधि दिलाएका छन् । यसमा सन् २०१६ देखि २०१८ सम्म लगातार तीन पटक च्याम्पियन्स लिग उपाधि जितेको कीर्तिमान समेत छ । यसबाहेक उनले २-२ पटक युरोपेली सुपर कप, क्लब विश्वकप र स्पेनिस सुपर कप तथा एक पटक ला लिगा उपाधि दिलाएका छन् ।