एजेन्सी – इटालियन क्लब एटलान्टाले इंग्लिस क्लब चेल्सीका मिडफिल्डर मारियो पासालिकलाई स्थायी अनुबन्ध गर्ने निर्णय गरेको छ । पछिल्लो दुई सिजन लोनमा खेलिरहेका पासालिकलाई एटलान्टाले यो सिजनको अन्त्यसँगै स्थायी अनुबन्ध गर्ने निर्णय गरेको हो ।

एटलान्टाका स्पोर्टिङ निर्देशक जियोभानी सार्टाेरीले २५ वर्षीय क्रोएसियन मिडफिल्डर पासालिकलाई स्थायी खेलाडीको रुपमा अनुबन्ध गर्ने पक्का भएको बताएका छन् । एटलान्टाले १३ मिलियन पाउन्डमा पासालिकलाई अनुबन्ध गर्ने बुझिएको छ ।  पासालिक सन् २०१४ मा क्रोएसियन क्लब हादजुक स्पिटबाट लन्डन क्लब चेल्सीमा आएपनि उनी लगातार लोनमा खेलिरहेका छन् । पासालिकले हालसम्म एटलान्टासँगै इल्चे, मोनाको, एसी मिलान र स्पार्कटक मस्कोबाट लोनमा खेलिसकेका छन् ।

‘हामी मारियो पासालिकलाई चेल्सीबाट स्थायी रुपमा आफ्नो खेलाडी बनाउन चहान्छौं । हामी खरिदको विकल्प प्रयोग गर्न चहान्छौं ।’ स्पोर्टिङ निर्देशक सार्टाेरीले भने, ‘क्रोएसियन खेलाडीको लागि सिरी ‘ए’ क्लबमा सम्झौता गर्न स्वतन्त्र छ । जबसम्म उनले १३ मिलियन पाउन्डको प्रक्रिया पुरा गर्दछ ।’

चेल्सीले गत सिजन मात्रै पेसालिकलाई २०२२ सम्मको लागि सम्झौता नवीकरण गरेको थियो ।  मिडफिल्डर पासालिकले एटालान्टाका लागि पछिल्लो दुई सिजनमा ७४ खेलमा १५ गोल गरेका छन् । उनी टोलीका मुख्य खेलाडीको रुपमा उभिएका छन् ।

उनकै उच्च प्रदर्शनमा एटलान्टा अघिल्लो सिरी ‘ए’ मा तेस्रो स्थानमा रहँदै पहिलोपटक च्याम्पियन्स लिगमा स्थान बनाउन सफल भएको थियो । एटलान्टा पहिलोपटक च्याम्पियन्स लिगको क्वाटरफाइनलमा पुग्न सफल भएको छ । एटलान्टाले प्रि–क्वाटरफाइनलमा स्पेनिस क्लब भ्यालेन्सियामाथि समग्रमा ८–४ को जित निकाल्दै क्वाटरफाइनलमा प्रवेश गरिसकेको छ ।

एटलान्टा यो सिजन पनि च्याम्पियन्स लिगको छनोट नजिक छ । चौथो स्थानमा रहेको एटलान्टाको ४८ अंक छ । एटलान्टालाई रोमा (४५) ले पछ्याइरहेको छ । कोरोना कारण गएको मार्चदेखि स्थगित सिरी ‘ए’ २० जुनदेखि शुरु हुदैछ । एटलान्टाले २१ जुनमा ससुलोसँग खेल्नेछ ।