एजेन्सी – कोरोनापछि शुरु हुन लागेको इंग्लिस प्रिमियर लिगअघिको मैत्रीपुर्ण खेलमा लन्डन क्लब चेल्सीले दोस्रो श्रेणीको क्वीन्स पार्क रेन्जर्स (क्युपिआर) माथि सानदार जित निकालेको छ ।

स्टामफोर्ड ब्रिजमा क्युपिआरमाथि ७–१ को फराकिलो जितमा चेल्सीका रुवेन लफटस चिक, बिल्ली गिल्मरले समान २ तथा मासन माउन्ट, विलियन र ओलिभर जिरुउडले समान एक गोल गरे ।

रुवेन लफटस चिक चोटका कारण पछिल्लो एक वर्षयता मैदान बाहिर रहेका थिए । उनले चोटपछिको पूनरागमनको आफ्नो पहिलो खेलमा उच्च प्रदर्शन गरेका हुन् । यस्तै बिल्ली गिल्मरले पनि क्युपिआरविरुद्धको खेलमा आफ्नो प्रभाव देखाए ।

अभ्यासमा फर्किएको केही दिनपछि त्रासका कारण टिमसँगको प्रशिक्षण छाडेर एकल प्रशिक्षणपछि पुन टिमसँगको प्रशिक्षणमा फर्किएका एङगोलो कान्टेले पनि क्युपिआरविरुद्धको खेलमा उच्च प्रदर्शन गरेका थिए ।

चेल्सीले पहिलो हाफमा ४–१ को आरामदायी अग्रता बनाएको थियो । दोस्रो हाफमा पनि चेल्सीले थप ३ गोल गर्दै फराकिलो जित आत्मसात गर्‍यो । यो जितले चेल्सी प्रिमियर लिगमा फर्कन तयार रहेको संकेत दिएको छ । १७ जुनपछि शुरु हुने प्रिमियर लिगमा चेल्सीले २१ जुनमा एस्टन भिल्लासँग खेल्दैछ ।

चेल्सी २९ खेलबाट ४८ अंक जोडेर शीर्ष चारभित्र रहेको छ । चेल्सीलाई म्यानचेस्टर युनाइटेडले पछ्याइरहेको छ । युनाइटेडको ४५ अंक छ । कोरोनाका कारण प्रिमियर लिग स्थगित हुनुअघि चेल्सीले एभर्टनमाथि ४–० को सानदार जित निकालेको थियो ।

क्युपिआर २०१४ मा प्रिमियर लिगमा बढुवा भएपनि अर्काे सिजन नै घटुवा हुन पुगेको थियो । च्याम्पियनसिपमा क्युपिआरले २० जुनमा ब्रान्सलीसँग प्रतिस्पर्धा गर्दैछ ।