एजेन्सी – स्पेनिस ला लिगा अन्तर्गत आइतबार जारी खेलमा रियल म्याड्रिडले पहिलो हाफमा एइबारविरुद्ध पहिलो हाफमा नै ३-० को अग्रता लिएको छ ।

खेलको चौथो मिनेटमा नै मिडफिल्डर टोनी क्रुसले गोल गर्दै रियललाई अग्रता दिलाएका थिए । उनले पेनाल्टी क्षेत्रको ठिक भित्रबाट पहिलो टचमा गरेको प्रहारलाई एइबारका गोलरक्षकले बचाउने कुनै मौका पाएनन् । एइबारले त्यसपछि गोल गर्ने प्रयास गरेपनि गोलरक्षक थिबाउट कोर्टुवा त्यसमा बाधक बने ।

रियलले खेलको ३० औं मिनेटमा अग्रता दोब्बर पार्यो । कप्तान सर्जियो रामोसले इडेन हाजार्डको पासमा गोल गरेका थिए । रामोस आफैंले एइबारका खेलाडीबाट खोसेको बललाई बेन्जेमालाई खेलाउँदै काउन्टर अट्याकमा अगाडी बढाएका थिए । बेन्जेमाले पेनाल्टी क्षेत्रभित्र हाजार्डलाई दिएको पासमा हाजार्डले आफूले प्रहार नगरी खाली पोस्ट अगाडी रहेका रामोसलाई पास दिएका थिए ।

खेलको ३७ औं मिनेटमा मार्सेलोको गोलसँगै रियलले ३-० को अग्रता बनायो । इडेन हाजार्डको शक्तिशाली प्रहारलाई गोलरक्षक डिमीट्रोभिचले विफल पारेपनि फर्केर आएको बललाई डिफेन्सले क्लियर गर्न नसक्दा मार्सेलोले शक्तिशाली प्रहारलाई गोलमा परिणत गरेका थिए ।

यस खेलमा जित दर्ता गरेमा रियलले शीर्षस्थानको बार्सिलोनासँगको दुरी २ अंकमा झार्नेछ । बार्सिलोनाको २८ खेलमा ६१ अंक रहेको छ भने रियल २७ खेलमा ५६ अंकसहित दोस्रोमा छ । एइबार भने यस खेलमा फर्कन नसके रेलिगेसन क्षेत्रबाट मात्र २ अंक टाढा रहनेछ ।