एजेन्सी – जर्मन बुन्डेसलिगामा आज राति ३१औं चरणका अन्तिम दुई खेलमा प्रतिस्पर्धा हुँदैछ । माइन्ज र अग्सवर्ग तथा साल्के र बायर लेभरकुसनबीच प्रतिस्पर्धा हुदैछ ।

साल्केले घरेलु मैदानमा राति ९ः४५ बजे बायर लिभरकुसनसाग प्रतिस्पर्धा गर्देछ ।  लिभरकुसन घरेलु टोली साल्केलाई पराजित गर्दै शीर्ष चारमा पुग्ने दाउमा हुनेछ । चौथो स्थानमा रहेको बोरुसिया मोन्चेनग्लाडवाकसँग समान ५६ अंक रहेपनि गोल अन्तरमा लिरकुसन पाँचौ स्थानमा रहेको छ ।

साल्केविरुद्धको जित या बराबरीले लेभरकुसन चौथो स्थानमा उक्लनेछ । हारले पाँचौ स्थानमा यथावत रहनेछ । लेभरकुसनका लागि युवा स्टार काइ हाभर्टज र लुकास एलारियो मुख्य हतियार हुनेछन् ।  कोरोनापछि सुरु भएको फुटबलमा लय गुमाएको साल्के घरेलु मैदानमा लेभरकुसनलाई पराजित गर्दै अंक तालिका सुधार गर्ने दाउमा हुनेछ ।

साल्के ३८ अंक जोडेर ११औं स्थानमा छ । लेभरकुसनमाथि जित या बराबरीको नतिजा निकाल्न सके साल्के नवौं स्थानमा उक्लनेछ । हारले ११औं स्थानमा नै यथावत रहनेछ ।  कोरोना पछिको पाँच खेलमा जित हात पार्न नसकेको साल्केले ४ हार र १ बराबरीको नतिजा निकालेको छ । त्यसैले साल्के कोरोनापछिको पहिलो जितको खोजीमा हुनेछ ।

साल्के र लेभरकुसनबीचको पछिल्लो १९ खेलको नतिजा हेर्दा लेरकुसन ९ खेलमा विजयी भएको छ । साल्केले ६ खेलमा जित हात पार्दा ४ खेल बराबरीमा सकिएको छ । साल्केले पछिल्लो तीन खेलमा लेभरकुसनमाथि जित निकाल्न सकेको छैन ।

यस्तै आइतबार नै माइन्ज र अग्सवर्गबीच प्रतिस्पर्धा हुदैछ । खेल माइन्जको मैदानमा साँझ ७ः१५ बजे हुनेछ । रेलिगेसन जोनभन्दा माथि रहेको माइन्ज र अग्सवर्गबीचको खेल निकै रोमाञ्चक र प्रतिस्पर्धात्मक हुन सक्नेछ । दुवै टोली जित हात पार्दै रेलिगेसन जोनबाट टाढै रहन चाहन्छ । माइन्ज ३१ अंक जोडेर १५औं स्थानमा तथा अग्सवर्ग ३२ अंक जोडेर १५औं स्थानमा छ ।