एजेन्सी – स्पेनिस महारथी रियल म्याड्रिडले आफ्ना कप्तान सर्जियो रामोसलाई थप एकवर्षको लागि सम्झौता नवीकरण गर्न प्रस्ताव गरेको छ । स्पेनिस सेन्टर ब्याक रामोसको रियलसँग हालको सम्झौता २०२१ सम्म रहेको छ ।

नयाँ सम्झौता भए उनी २०२२ सम्म म्याड्रिडमै रहनेछन् । रामोस सन् २००५ देखि म्याड्रिडमा रहेका छन् ।  ३४ वर्षे रामोस प्रशिक्षक जिनेदिन जिदानको मन जित्न सफल खेलाडी हुन् । रियलको प्रस्ताव स्वीकार गर्ने या नगर्ने रामोसकै निर्णयमा भर पर्नेछ । रामोसले सन्यास लिनुअघि अमेरिकी मेजर लिग सकर (एमएलएस) खेल्ने र त्यसपछि प्रशिक्षण करियर थाल्ने योजना बनाएका छन् ।

रामोसले नयाँ सम्झौता नवीकरण गरे रियलमा थप कीर्तिमान समेत बनाउने छन् । त्यसैले रामोसले सम्झौता नवीकरण स्वीकार्दै रियलमै बस्न सक्नेछन् । आफ्नो व्यावसायिक खेल करियरको अन्त्यतिर रहेका ३४ वर्षे रामोसले रियलबाट सर्वाधिक खेलमा कप्तानी गर्ने कीर्तिमान बनाउने सम्भावना छ । रियलमा यो कीर्तिमान लेजेन्ड राउल गोन्जालेज ब्लान्कोको नाममा रहेको छ ।

सन् २००५ देखि रियलमा रहेका रामोसले हालसम्म ६४० खेल खेल्दा २५२ खेलमा कप्तानी गरेका छन् । उनीभन्दा अघि राउलले २९८ खेलमा कप्तानी गरेका थिए । राउलले १९९४ देखि २०१० सम्म ७४१ खेल खेल्दा २९८ खेलमा रियलको कप्तानी सम्हालेका थिए । राउलले २००३ देखि रियलको कप्तानी सम्हालेका थिए । त्यसपछि इकर कासियसले २०१० देखि २०१५ सम्म रियलको कप्तानी गरेका थिए ।

रामोस राउलभन्दा ४६ खेलले मात्रै पछि छन् । रामोसको रियलमा २ वर्षको सम्झौता भएमा उनले यो लक्ष्यलाई भेटाउन सक्नेछन् ।
रियलमा हालसम्म १ सय भन्दा बढी खेलमा कप्तानी गर्नेमा राउल (२९८), रामोस (२५२), कासियस (२३४) र फर्नान्डो हिएरो (१०८) छन् ।

सन् २०१४/१५ को सिजनपछि इकर कासियसबाट कप्तानको आर्मब्याण्ड पाएका रामोसले रियलबाट २१ उपाधि जित्दा आफ्नै कप्तानीमा ५ सिजन बिताउँदा ११ उपाधि जितेका छन् । जसमा समान तीन च्याम्पियन्स लिग र फिफा क्लब विश्वकप, समान दुई युइएफए सुपर कप र सुपर कोपा र एक स्पेनिस ला लिगा रहेका छन् । रामोसले यो सिजन ३४ खेल खेल्दै ७ गोल गरेका छन् ।