एजेन्सी – इभान राकिटिचले आफु बार्सिलोना बस्न चाहेको फेरि एक पटक प्रष्ट पारेका छन् । क्रोएसियन मिडफिल्डरले केहि दिन अघि क्लबका पदाधिकारीसँग भेटेर क्लब छाडेर जाने कुनै सोच नभएको भन्दै आफ्नो कुरा प्रष्ट राखेका बताएका छन् ।

‘दश वा १५ दिन अघि मैले क्लबका पदाधिकारीसँग आफ्नो कुरा राखेका थिए ,’ उनले भने,’ मलाई क्लब छाडेर जाने विषयमा कुनै कुरा गर्नु छैन । मेरो सम्झौता सन् २०२१ सम्म छ । बार्सिलोना त्यहि क्लब हो जहाँबाट म खेल्न चाहन्छु ।’

उनले श्रीमती र छोरीहरु पनि बार्सिलोनमा खुसी रहेको बताएका छन् । ‘मैले अरु सोच्नु पर्ने कुनै कारण छैन ,’ उनले थपे, ‘म यहाँ राम्रो अभ्यास गरिरहेको छु । मलाई विश्वास छ राकटिक बार्सिलोनामा लामो समय रहनेछ ।’

पहिलो रोजाईमा पर्न छाडे पनि ३२ वर्षे मिडफिल्डरले त्यसलाई सहज रुपमा लिइरहेका छन् । ‘खेल्न नपाउँदा राम्रो लाग्दैन । त्यसमा पनि किन खेलाइएको छैन भन्ने बताइदैन त्यति बेला झन् दुःख लाग्छ, ‘उनले थपे, ‘तर म प्रशिक्षकको निर्णयको सम्मान गर्छु । म समूहगत खेलमा छु । व्यक्तिगत खेलमा होइन । ‘

राकिटिचको इच्छा नभएपनि बार्सिलोनाले भने उनलाई बिक्री गर्ने खेलाडीको सुचिमा राखेको छ । उनीमाथि एट्लेटिको म्याड्रिड र सेभिल्लाले चासो राखेका बताइएको छ । राकिटिच सेभिल्लाबाट नै बार्सिलोना आएका थिए ।