एजेन्सी – जर्मनीको शीर्ष डिभिजन लिग, जर्मन बुन्डेसलिगामा आज (शनिबार) ३० औं चरणका विभिन्न पाँच खेलहरु हुँदैछ । शीर्ष टोली बायर्न म्युनिख, बोरुसिया डर्टमुन्ड र आरबी लाइप्जिगले फरक टोलीसँग खेल्दैछन् ।

उपाधिको झिनो आशा बाँकी रहेको बोरुसिया डर्टमुन्डले घरेलु मैदानमा हेर्था बर्लिनको आतिथ्यता गर्दैछ । खेल सिग्नल इडुना पार्क डर्टमुन्डमा राति १०ः१५ बजेपछि हुनेछ । त्यसअघि शीर्षस्थानको बायर्नले लिभरकुसनसँग साँझ ७ः१५ मा खेल्दैछ । उपाधिको आशा जिवितै राख्न डर्टमुन्डले हर्थालाई पराजित गर्नुको विकल्प छैन । तर, बायर्नको खेलको नतिजाले पनि अंक तालिकामा प्रभाव पार्न सक्नेछ ।

शीर्षस्थानको बायर्नको २९ खेलबाट ६७ अंक छ । समान खेलबाटै डर्टमुन्डको ६० अंक छ । अर्थात डर्टमुन्ड ७ अंकले पछि छ । अघिल्लो खेलमा बायर्न पराजित भएको अवस्थामा डर्टमुन्डले पनि आफु अनुकुल नतिजा निकाल्न सके अंक दुरी पुनः ४ मा छोट्याउने छ । बराबरी या हारले डर्टमुन्डको उपाधि यात्रा लगभग समाप्त हुनेछ ।

डर्टमुन्डसँग युवा स्टार जाडोन सान्चो, थोर्गन हजार्ड, जुलियन ब्रान्ट, अचरफ हाकिमी जस्ता खेलाडीको साथ रहँदा युवा सनसनी एर्लिङ ब्राउट हालान्डलाई चोटका कारण गुमाउनेछन् । हालान्डले यसअघि पाडेरबर्नविरुद्धको खेल पनि गुमाएका थिए । उक्त खेलमा सान्चोले ह्याट्रिक पुरा गरेका थिए ।

यता, हर्था बर्लिन पनि डर्टमुन्डलाई पराजित गर्दै अंक तालिका सुधार गर्ने लक्ष्यमा हुनेछ । हर्था ३८ अंक जोडेर नवौं स्थानमा छ । यि दुई टोलीबीचको पछिल्लो १७ खेलको नतिजा हेर्दा डर्टमुन्ड नै हावी छ । डर्टमुन्डले ८ खेलमा जित निकाल्दा ५ बराबरी र ४ हारको नतिजा निकालेको छ ।