एजेन्सी – स्पेनिस क्लब रियल म्याड्रिडले जर्मन युवा स्टार काई हाभर्टजलाई अनुबन्ध गर्न आकर्षक प्रस्ताव गर्ने भएको छ । रियलले जर्मन क्लब बायर लिभरकुसनका हाभर्टजलाई अनुबन्धन गर्न ७१ मिलियन पाउन्डको प्रस्ताव अगाडी सार्ने भएको छ ।

रियलले हाभर्टजलाई अनुबन्धन गरेपनि अर्काे सिजन मात्रै उनी क्लबमा आउने बुझिएको छ । क्लबनिकट स्रोतका अनुसार हाभर्टज अर्काे सिजनको समरसम्म लेभरकुसनमै रहनेछन् । २० वर्षीय युवा मिडफिल्डर हाभर्टजले यो सिजन उच्च प्रदर्शन गरिरहेका छन् । उनले यो सिजन लिभरकुसनका लागि १५ गोल र ८ असिस्ट दिएका छन् ।

जर्मनीका लागि ४ खेल खेलेका हाभर्टजले पछिल्लो समय उत्कृष्ट प्रदर्शन गर्दै विश्व फुटबलको ध्यान खिच्न सफल भएका छन् । हाभर्टजलाई अनुबन्ध गर्न जर्मन क्लब बायर्न म्युनिखले समेत चासो देखाइरहेको छ । बिल्डका अनुसार म्याड्रिडले हाभर्टजको हस्ताक्षरका लागि अन्य प्रतिस्पर्धीलाई पछि पार्नेछ । लेभरकुसनलाई २०२१ को समरसम्म खेलाडी लोनमा दिने विकल्प मुख्य पक्षको रुपमा हेरिएको छ ।

यस सम्झौताले दुवै क्लबलाई फाइदा हुने देखिएको छ ।  जिनेदिन जिदानले युरोपको उत्कृष्ट मिडफिल्डरको रुपमा हेरिएको हाभर्टजलाई सुरक्षित साथ क्लबमा ल्याउन सक्नेछन् । अर्को सिजन रियलले मोड्रीच र क्रुस दुवैको साथ छोड्ने र यस सिजन क्लबमा मिडफिल्डको संख्या धेरै रहेकाले दीर्घकालीन योजनाको रुपमा हाभर्ट्जलाई हेरिएको छ ।

बायरका खेल निर्देशक सिमोन रोल्फ्सले भने हाभर्टज जहाँ पनि जान सक्ने बताएका छन् । ‘काइलाई के हुन्छ हामीलाई थाहा छैन । हामीलाई थाहा छ कि जर्मनी र युरोपका ठुला क्लबहरु उनको पछि लागेका छन् । उनको जहाँसुकै खेल्न सक्ने क्षमता छ । उनी उत्कृष्ट खेलाडी हुन्,’ खेल निर्देशक सिमोनले मार्कासँग भने ।

‘धेरै वर्षदेखि बायर्न जहिले पनि युवा खेलाडीको प्रतिभाको पछि रहेको छ । त्यहाँ प्रभाव पार्न सक्ने धेरै कारकहरु छन् । उनको भविष्यको कुनै निर्णय भएको छैन । मलाई उनले लेभरकुसनको जर्सीमा लामो समय खेलेको हेर्न एकदमै मन छ । मसँग अन्य कुनै प्राथमिकता छैन । उनी आउदो दशकमा एक सर्वाेत्कृष्ट फुटबलर भएर निस्कनेछन् ।’