एजेन्सी – मर्सिसाइड क्लब लिभरपुल कोरोना महामारीपछि १७ जुनदेखि सुरु हुन लागेको इंग्लिस प्रिमियर लिगको पहिलो खेलबाटै च्याम्पियन बन्न सक्ने देखिएको छ ।

नयाँ खेल तालिका अनुसार दोस्रो स्थानमा रहेको म्यानचेस्टर सिटीले पहिलो दिन नै आर्सनलको सामना गर्नेछ । २२ जुनमा बर्नलीसँग खेल्ने तालिका छ । शीर्षस्थानमा रहेको लिभरपुलले २१ जुनमा एभर्टनसँग खेल्नेछ । सिटी आर्सनलसँग पराजित भएको अवस्थामा तथा लिभरपुलले एभर्टनलाई पराजित गरेको अवस्थामा पहिलो खेलबाटै च्याम्पियन बन्न सक्नेछ ।

लिभरपुल ३० वर्षपछि प्रिमियर लिगको उपाधि नजिक छ । लिभरपुलले सिटीसँग २५ अंकको फराकिलो अग्रता बनाएको छ । लिभरपुलको २९ खेलबाट ८२ अंक छ । सिटीको २८ खेलबाट ५७ अंक छ ।

प्रिमियर लिग आयोजकले शुक्रबार २९औं चरणको बाँकी रहेका २ र अरु तीन चरणको गरी ३२ खेलको खेल तालिका सार्वजनिक गरेको छ । नयाँ तालिका अनुसार सिटीले ९ दिनभित्र तीन खेल खेल्नेछ । सिटीले आर्सनलपछि दोस्रो खेल जुन २२ मा वर्नली र तेस्रो खेल चेल्सीसँग जुन २५ मा खेल्नेछ ।

१७ जुनमा एस्टन भिल्ला र सेफिल्ड युनाइटेडबीच पनि खेल हुनेछ । जुन १९ देखि ३०औं चरणका खेल सुरु हुनेछन् । जुन १९ मा नर्विच सिटी र साउथह्याम्पटन तथा टोटेनहम हट्सपर र म्यानचेष्टर युनाइटेडबीच खेल हुनेछ ।

यस्तै जुन २० मा वाटफोर्ड र लेस्टर, ब्राइटन र आर्सनल, वेष्टह्याम र वुल्भ्स तथा बर्नमाउथ र क्रिस्टल प्यालेसबीच हुनेछ । यस्तै शीर्षस्थानको लिभरपुलले जुन २१ मा एभर्टनसँग खेल्नेछ ।