एजेन्सी – पोर्चुगिज क्लब बेन्फिकाका दुई खेलाडी समर्थकले मैदानबाहिर रहेर टिम बसमा ढुंगा प्रहार गरेपछि घाइते भएर अस्पतालमा भर्ती भएका छन् ।

कोरोना भाइरस संक्रमणका कारण स्थगित लिग सुचारु भएपछिको पहिलो खेलमा बेन्फिका तोन्देलासँग गोलरहित बराबरीमा रोकिएको थियो । खेलमा गोल गर्ने अवसर पाएपनि त्यसको सदुपयोग गर्न नसक्दा बेन्फिकाले अंक तालिकाको शीर्षस्थानमा अग्रता बनाउनबाट चुकेको थियो । खेल जित्न नसकेको रिसमा समर्थकले टिम चढेको बसमा ढुंगा प्रहार गरेपछि दुई खेलाडी घाइते भएर अस्पतालमा भर्ती हुनुपरेको हो ।

जर्मन मिडफिल्डर जुलियन वाइगल र सर्बियन मिडफिल्डर आन्द्रिजा जिभ्कोभिचको अनुहारमा चोट लागेको छ । समर्थकले प्रहार गरेको ढुंगा गाडीको झ्यालको सिसामा लाग्दै अनुहारमा लागेपछि दुवै खेलाडीलाई थप उपचारका लागि अस्पताल पुर्याइएको हो । नजिकै रहेको प्रशिक्षण केन्द्रमा प्रारम्भिक उपचार गरेपछि दुवै खेलाडी अस्पताल पिगेका थिए ।

कोरोनाका कारण लिग स्थगित हुँदा बेन्फिका अंक तालिकाको दोस्रो स्थानमा थियो । एक अंकको अग्रता लिएको पोर्टो अघिल्लो दिन पराजित भएपछि बेन्फिकाले अग्रता लिने अवसर पाएको थियो । पोर्टो फामालिकाओसँग २-१ ले स्तब्ध भएको थियो । तर बेन्फिका बराबरीमा रोकिँदा दुवै टोलीको समान अंक रहेको छ । ९ चरणको खेल बाँकी रहँदा दुवै टोलीले ६० अंक जोडेका छन् ।

समग्रमा बेन्फिकाले लगातार तेस्रो बराबरी खेलेको छ । पछिल्लो चार खेलमा बेन्फिका घरेलु मैदानमा जितविहिन रहेको छ ।