एजेन्सी – जर्मनी तथा जर्मन क्लब आरबी लाइप्जिगका फरवार्ड टिमो वेर्नर इंग्लिस क्लब चेल्सीमा आउने भएका छन् । चेल्सीले वेर्नरलाई ५ वर्ष सम्झौतासहित ५२ मिलियन पाउन्डको अनुबन्ध प्रस्ताव गरेको छ । 

अनुबन्ध सफल भए जर्मन बुन्डेस लिगामा उच्च प्रदर्शन गरिरहेका वेर्नर २०२५ सम्म लन्डन क्लब चेल्सीमा रहनेछन् । लिभरपुलले वेर्नरको रिलिज क्लजको मुल्य तिर्न असहमत भएपछि चेल्सीले त्यसको फाइदा उठाएको हो । वेर्नरले प्रतिसाता १ लाख ८० हजार पाउन्ड पाउनेछन् । उनको वार्षिक कमाइ ९ मिलियन पाउण्ड हुन आउछ ।

खेलाडी अनुबन्धमा प्रतिबन्ध बेहोरेको चेल्सीले गत सिजन इडेन हजार्ड बेच्दा केही रकम संकलन गरेको थियो । सोही रकम नै परिपक्व फरवार्ड वेर्नर अनुबन्धको लागि पर्याप्त बन्नेछ । अनुबन्ध सफल भएको खण्डमा चेल्सीले उनलाई केही दिनमा सार्वजनिक गर्नेछ । उनको सम्झौता प्रावधान अनुसार ५२ मिलियन पाउण्ड रिलिज क्लज अर्को साता समाप्त हुने भएकाले चेल्सीले त्यसको फाइदा उठाएको हो ।

भिएफवी स्टुटगार्टबाट करियर शुरु गरेका २४ वर्षीय वेर्नरले बुन्डेस लिगामा यो सिजन २५ गोल गर्दै सर्वाधिक गोलकर्ताको सुचीमा दोस्रो स्थानमा रहेका छन् । उनी भन्दा अघि बायर्न म्युनिखका रोवर्ट लेवान्डोस्की (२९) छन् । वेर्नरले यो सिजन लाइप्जिगका लागि ४० खेलमा ३१ गोल गरेका छन् । २०१७ देखि जर्मी राष्ट्रिय टोलीमा रहेका वेर्नरले २९ खेलमा ११ गोल गरेका छन् ।

चेल्सीले गत फेब्रुअरीमा मोरक्को तथा डच क्लब आयाक्सका हाकिम जिएकलाई ३६ मिलियन पाउन्डमा अनुबन्ध गरिसकेको छ । वेर्नर यो सिजनमा चेल्सीमा अनुबन्ध हुने दोस्रो खेलाडी बन्नेछन् ।