एजेन्सी – इंग्लिस मिडफिल्डर जेडन सान्चोले पछिल्लो समय जर्मन क्लब बोरुसिया डर्टमुन्डबाट खेल्दै तहल्का मच्चाइरहेका छन् । म्यान्चेस्टर सिटीबाट सिनियर टिममा फुटबलको खोजीमा डर्टमुन्ड जाने उनको निर्णय सहि सावित भएको छ ।

२० वर्षीय सान्चोले आइतबार जर्मन बुन्डेसलिगा अन्तर्गत पाडेरबर्नविरुद्ध खेलमा ह्याट्रिक प्रहार गर्दै विश्व फुटबलमै बिरलै देखिने उपलब्धि हासिल गरेका छन् । उनको ह्याट्रिककै मदतले डर्टमुन्ड ६-१ ले विजयी भएको थियो । जारी सिजन निकै फर्ममा रहेका सान्चोले एकै सिजनमा १५ गोल र १५ असिस्ट पूरा गर्दै दुर्लभ उपलब्धि हासिल गरेका छन् ।

सान्चोले हालसम्म यस सिजन १७ गोल र १७ असिस्ट दिएका छन् । उनी सन् २००५-०६ सिजनपछि युरोपको शीर्ष लिगमा यो उपलब्धि हासिल गर्ने पहिलो इंग्लिस खेलाडी बनेका छन् । समग्रमा उनी लिओनेल मेस्सी, इडेन हाजार्ड, क्रिस्टियानो रोनाल्डो र लुइस सुआरेजपछि यो सफलता प्राप्त गर्ने पाँचौ खेलाडी बनेका छन् ।

मेस्सीले हालसम्म ४ पटक यो उपलब्धि हासिल गरेका छन् । मेस्सीले सन् २०१०-११ सिजनमा ३१ गोल र १८ असिस्ट, २०११-१२ मा ५० गोल र १६ असिस्ट,२०१४-१५ सिजनमा ४३ गोल र १८ असिस्ट तथा २०१५-१६ सिजनमा २६ गोल र १६ असिस्ट दिएका थिए ।

हाजार्डले भने सन् २०११-१२ मा फ्रान्सेली क्लब लिलबाट खेल्दै २० गोल र १६ असिस्ट तथा सन् २०१८-१९ सिजनमा चेल्सीका लागि १६ गोल र १५ असिस्ट प्रदान गरेका थिए ।

क्रिस्टियानो रोनाल्डोले सन् २०१४-१५ सिजनमा रियलको जर्सीमा ४८ गोल र १६ असिस्टको प्रदर्शन गरेका थिए । सुआरेजले २०१५-१६ सिजनमा ४० गोल र १६ असिस्टको उपलब्धि हासिल गरेका थिए । सुआरेजको उक्त प्रदर्शनले बार्सिलोना लिग च्याम्पियन बनेको थियो ।