काठमाडौं (हाम्रो खेलकुद) – अखिल नेपाल फुटबल संघ (एन्फा) का अध्यक्ष कर्माछिरिङ शेर्पाले राष्ट्रियताको विषयमा दिएको विवादास्पद अभिव्यक्तिका विषयमा मधेशी आयोगले छानबिन प्रक्रिया अघि बढाएको छ ।

केहि दिन अघि अध्यक्ष शेर्पाले वेभ अन्तवार्ता दिने क्रममा तराई तिर जाँदा राष्ट्रिय अहिल कम भएको बताएपछि उनी विवादमा परेका थिए ।लिखित उजुरी नआएपनि अध्यक्ष शेर्पाको अभिव्यक्ति नोटिसमा आएको आयोगका अध्यक्ष डा. विजयकुमार दत्तले हाम्रो खेलकुद डटकमलाई जानकारी दिए ।

‘उहाँको अभिव्यक्ति हाम्रो नोटिसमा आएको छ,’ अध्यक्ष दत्तले भने, ‘छानविनमा दोषी पाइयो भने हामी त्यो विषयसँग सम्बन्धित निकायलाई सिफारिस गर्नेछौं ।’अध्यक्ष शेर्पाले गत जेठ ४ गतेको अन्तवार्तामा तराईका ४ जिल्ला (सप्तरी, सिराह, धनुषा र महोत्तरी)मा नेपाली सेनाको सहकार्यमा राष्ट्रियता सिकाउन र खेलाडी उत्पादन गर्न ग्रासरुट फुटबल सुरू गरेको बताएका थिए ।

शेर्पाको अभिव्यक्तिको लिएर छानविन गर्न आवज उठेको थियो । जेठ १४ गते नेपाली समाजमा विभेदको विजारोपण गरेको भन्दै समाजवादी पार्र्टीका सांसद विमलप्रसाद श्रीवास्तवले शेर्पामाथि छानबिन र कारबाहीको माग गरेका थिए ।

एन्फाका चार जिल्ला (काठमाडौं, ललितपुर, भक्तपुर र धादिङ) फुटबल संघका अध्यक्षले शेर्पालाई कारबाहीको माग गरेर प्रधानमन्त्री केपी शर्मा ओलीसँग माग गरेका छन् । उनीहरुले मन्त्री परिषद् तथा प्रधानमन्त्रीको कार्यालय र युवा तथा खेलकुद मन्त्रालयमा उजुरी दर्ता गराएका थिए ।