एजेन्सी – प्रशिक्षक किके सेटिन बार्सिलोनामा नियुक्त भएपछि पहिलोपटक आफ्नो पूर्ण टोलीसँग प्रशिक्षण गर्न पाएका छन् । चोटका कारण बाहिर रहेका फरवार्ड लुइस सुआरेज समेत प्रशिक्षणमा समावेश भएपछि सेटिनले पहिलो पटक पूरा टोलीलाई प्रशिक्षण दिए ।

उरुग्वेका फरवार्ड सुआरेज जनवरीको दोस्रो साता स्पेनिस सुपरकपको सेमिफाइनल खेलमा एटलेटिको म्याड्रिडविरुद्ध खेल्दा घाइते भएका थिए । उक्त खेल नै तत्कालिन प्रशिक्षक एर्नेस्टो भालभेर्डेको अन्तिम खेल हुन पुगेको थियो । बार्सिलोनाले सेटिनलाई उनको स्थानमा ल्याएको थियो ।

सुआरेजले चोट बोकेपछि शल्यक्रिया नै गर्नुपर्दा लामो समय मैदानबाहिर रहने भएका थिए । उनले सिजन गुमाउने पक्का भएको थियो । तर कोरोनाका कारण लिग नै स्थगित हुँदा सुआरेज ठिक भएर मैदान फर्किएका छन् । उनले शल्यक्रियापछि चार महिना पूर्ण रुपमा विश्राम गरेका थिए ।

बार्सिलोनाले जुन १३ मा ला लिगा सुचारु भएपछि खेल्दा सुआरेजसँग लिओनेल मेस्सी र एन्टोइन ग्रिजमन पनि आक्रमणमा साथ दिन उपलब्ध हुनेछन् । ग्रिजमनको आगमनपछि विविध कारणले यी तीन खेलाडीले सँगै खेल्न पाएका छैनन् । सुरुवातमा मेस्सी घाइते हुनु र पछिल्लो समय सुआरेज उपलब्ध नहुनु यसको मुख्य कारण रहेको छ ।

जारी सिजन मेस्सी, सुआरेज र ग्रिजमनले १३ खेलमा सँगै खेलेका छन् । यसक्रममा टोलीले ८ जित, ३ बराबरी र २ खेलमा हार बेहोरेको छ । यीमध्य मात्र एक खेलमा तीनै खेलाडीले गोल गर्न सफल भएका छन् । अक्टोबरमा एइबारविरुद्ध खेलमा तीनैजनाले गोल गरेका थिए ।

सुआरेज लामो समय मैदानबाहिर रहेपनि लिगमा यस सिजन ११ गोल गरेका छन् । मेस्सी १९ गोलसहित लिगको सर्वाधिक गोलकर्ता सुचिमा शीर्षस्थानमा छन् । ग्रिजमनले पनि जारी सिजन ८ गोल गरिसकेका छन् ।