एजेन्सी – स्पेनिस महारथी रियल म्याड्रिडले कोरोना संक्रमणका कारण स्थगित भएपछि सुचारु हुन लागेको ला लिगाका खेलहरू घरेलु मैदान सान्टियागो बर्नाबाउमा नखेल्ने भएको छ ।

लिग अन्तर्गत रियलले सुरुवाती दुई खेल नै घरेलु मैदानमा खेल्ने तालिका रहेको छ । तर रियलका अध्यक्ष फ्लोरेन्टिनो पेरेजले सिजनका बाँकी खेल बर्नाबाउमा नखेल्ने पक्का गरेका छन् । रियलले आफ्नो सबै घरेलु खेल भाल्डेबासस्थित अल्फ्रेडो डि स्टेफानो रंगशालामा खेल्ने भएको छ ।

रियलले यसअघि सोहि मैदानमा नियमित प्रशिक्षण गर्दै आएको छ । त्यस्तै रियलको दोस्रो टोली रियल म्याड्रिड कास्टिलाका खेल पनि यसै मैदानमा हुँदै आएको छ । ला लिगामा लागि उपयुक्त बनाउन मैदानमा केहि सुविधा थप गरिनेछ । भिडियो असिस्टेन्ट रेफ्री, फ्लडलाइट्स लगायत सुविधा थप गरिनेछ ।

बर्नाबाउमा पुनर्निर्माणको कार्य भइरहेका कारण खेलस्थल सारिएको अध्यक्ष पेरेजले बताए । ‘ हामीले भाल्डेबासको मैदानमा बाँकी घरेलु खेल खेल्ने निर्णय गरेका छौं । बर्नाबाउमा भइरहेको निर्माण कार्य समयमै सकियोस् भनेर यो कदम चालिएको हो,’ पेरेजले भने ।

बर्नाबाउमा नयाँ सुविधा थप गर्ने योजना सन् २०२२ सम्म सकाउने प्रारम्भिक योजना थियो । तर अहिले नै यो कामलाई निरन्तरता दिँदा निर्माण चाँडै हुने देखिन्छ । बर्नाबाउमा नयाँ छतसँगै घाँसे मैदानको विकल्पका रुपमा दोस्रो पिच पनि बनाउने तयारी छ । यसले फुटबल बाहेकको कार्यक्रमलाई पनि रंगशाला प्रयोग गर्न सकिनेछ ।

रियलले लिग सुरु भएपछि पहिलो खेलमा एइबारको सामना गर्नेछ । खेल ६ हजार दर्शक क्षमता भएको रियलको नयाँ घरेलु मैदानमा हुनेछ ‌। यध्यपी खेलमा दर्शकहरूको उपस्थिति हुने छैन । लिगमा रियल बार्सिलोनाभन्दा २ अंकले पछाडि छ ।