एजेन्सी – इटालियन क्लब इन्टर मिलानले अर्जेन्टिनी फरवार्ड माउरो इकार्डीलाई फ्रान्सेली क्लब पेरिस सेन्ट जर्मेन (पीएसजी) मा बेच्दा भविष्यमा युभेन्टसमा जान रोक्नका लागि बेग्लै प्रावधान राखेको छ ।

युभेन्टसले लामो समयदेखि इकार्डीलाई अनुबन्धन गर्न खोजेपनि इन्टरले आफ्नो प्रतिद्वन्द्वी भएकै कारण उनलाई त्यहाँ जान दिएको थिएन । गत सिजन इकार्डी आफैंले पनि इन्टरलाई युभेन्टसको प्रस्ताव स्वीकार्न आग्रह गरेका थिए, तर त्यसले क्लबसँग उनको सम्बन्ध झनै खराब बनाएको थियो । इकार्डीकी श्रीमती तथा एजेन्ट वान्डा नाराका कारण पनि क्लबसँग उनको सम्बन्ध राम्रो हुन सकेन ।

गत सिजन लोनमा पीएसजी पुगेका इकार्डी सोमबार स्थायी रुपमा पीएसजीमा अनुबन्ध भएका छन् । पीएसजीले इन्टर मिलानलाई ५८ मिलियन युरो तिरेको हो । इन्टरले माग गरेको ७० मिलियन युरो कोरोनाका कारण दुवै क्लब समस्यामा परेपछि घटाएर सम्झौता गरिएको हो ।

सम्झौता अनुसार इन्टरले इकार्डीको भविष्यको क्लबलाई असर पर्ने गरि अर्को प्रावधान थपेको छ । उक्त प्रावधानका अनुसार पीएसजीले इकार्डीलाई कुनैपनि इटालीको क्लबमा बेचेको खण्डमा पीएसजीले १५ मिलियन युरो थप इन्टरलाई तिर्नुपर्ने छ । यसले इकार्डी युभेन्टससहित इन्टरको प्रतिद्वन्द्वी क्लब जाने सम्भावना निकै कम हुन्छ ।

इकार्डी अघिल्लो सिजनसम्म इन्टरको कप्तान रहेपनि सम्बन्ध बिग्रंदै जाँदा दुश्मनजस्तै भएका थिए । समर्थकले पनि पटक पटक उनको विरुद्धमा नाराबाजी लाएका थिए । इकार्डीको खराब सम्बन्धको मुख्य कारण उनको श्रीमती नारा र बोर्डको असमझदारी रहेको छ ।