एजेन्सी – इटालियन क्लब ब्रेसियाका २० वर्षीय मिडफिल्डर सान्ड्रो टोनालीलाई दिग्गज मिडफिल्डर आन्द्रेए पिर्लोसँग दाँजिदै आएको छ । टोनाली आफैं पनि दुवैको उस्तै कपाल रहेकाले समर्थकले दाँजेको बताउँछन् ।

तर यी युवा मिडफिल्डरको प्रदर्शन पनि कम्तिको छैन । खेल्ने शैली र खेलमा छाड्ने प्रभावले गर्दा नै टोनालीलाई अर्का पिर्लो भनेर नामाकरण गरिएको छ । त्यसो त पिर्लोले पनि ब्रेसियाबाट नै करीअर अगाडी बढाएका थिए । इटालियन शीर्ष डिभिजनमा रेलिगेसन क्षेत्रमा संघर्षरत टोलीका लागि खेलेपनि टोनालीको प्रदर्शन उत्कृष्ट रहेको छ ।

ब्रेसिया यो सिजन रेलिगेसनमा पर्ने लगभग पक्काजस्तो छ । त्यसैले पनि टोनालीलाई अनुबन्धन गर्न क्लबहरुको प्रस्ताव सुरु भइसकेको छ । ब्रेसियाका मालिक मासिमो सेलिनोका अनुसार हाल उनलाई अनुबन्ध गर्न युरोपका ठूला ४ क्लबले प्रस्ताव राखेका छन् । इटालीका युभेन्टस र इन्टर मिलानसँगै फ्रान्सेली पेरिस सेन्ट जर्मेन र बार्सिलोनाले क्लबसँग सम्पर्क गरिसकेको छ ।

तर सेलिनोको जानकारी अनुसार टोनाली इटालीमै बस्न चाहन्छन् । पीएसजीले उनलाई अनुबन्ध गर्न विस्तृत योजनासहित प्रस्तुत भएपनि उनले त्यहाँ जाने इच्छा देखाएनन् । अध्यक्ष नासिर एल खलिफा आफैंले टोनालीका लागि सम्पर्क गरेको सेलिनोले बताए । अब इटालियन क्लबले नै अर्को सिजन उनलाई अनुबन्ध गर्ने देखिएको छ ।

सेलिनो यसअघि लिड्स युनाइटेड र काग्लियारीमा समेत रहेका थिए । उनका अनुसार नेपोली र फिओरेन्टिनाले पनि टोनालीमा नजर राखेका छन् । तर खेलाडी आफैं भने इन्टर अथवा युभेमा जान चाहन्छन् । नेपोलीले यसअघि नै ४० मिलियन युरोको प्रस्ताव राखेको उनले बताए ।

सेलिनोका अनुसार बार्सिलोनाले टोनालीकै लागि दुई खेलाडी र रकमसहितको प्रस्ताव अगाडी सारेको थियो । ‘कोरोनाअघि ब्रेसियालाई ६५ मिलियन युरो र दुई युवा खेलाडीको प्रस्ताव आएको थियो । दुवै खेलाडी ७.५ मिलियन भाउका थिए र एकजना फुलब्याक खेल्थे,’ सेलिनोले भने,’ तर बार्सिलोनाले अपेक्षा गरेअनुसार उत्तर पाएन । टोनालीबाट उत्तर गएको थिएन ।’

सेलिनोले सिजनमा अझै १२ खेल बाँकी रहेकाले अहिले  निर्णय नलिने बताए । ‘म अहिले कसैसँग निर्णय दिन चाहन्न । लिगमा अझै १२ खेल बाँकी छन् र टोनालीले पनि खेलमा ध्यान दिनुपर्छ,’ उनले भने ।