एजेन्सी – इटालियन क्लब एसी मिलानका पुर्व खेलकुद निर्देशक मासिमिलियानो मिराबेल्लीले पोर्चुगिज सुपरस्टार क्रिस्टियानो रोनाल्डोले युभेन्टसमा जानुअघि एसी मिलानसँग सम्झौता नजिक पुगेको खुलासा गरेका छन् । 

क्लबका चिनियाँ मालिक लि योङहोङले रोनाल्डोको सम्झौता रोकेपछि मात्रै उनी युभेन्टस पुगेको मिराबेलीले बताएका छन् । २०१८ मा रोनाल्डोले विश्वलाई नै चकित पार्दै स्पेनिस क्लब रियल म्याड्रिड छाडेर इटली जाने निर्णय गरेका थिए ।

रोनाल्डो रियलका सर्वाधिक गोलकर्ता हुन् । उनले रियलमा आफ्नो नाममा थुप्रै कीर्तिमान बनाएका छन् । विशेषगरि च्याम्पियन्स लिगमा उनको सफलतालाई निकै महत्वपूर्ण मानिन्छ ।

ट्रान्सफर मार्केट अघि बढ्दै जादा रोनाल्डो एसी मिलानसँग सम्झौता नजिक पुगेका थिए । तर, क्लबका मालिक लि योङहोङले आर्थिक कारण देखाउँदै सम्झौता रोकेपछि रोनाल्डो १०० मिलियन पाउन्डमा युभेन्टसमा अनुबन्धित भएका थिए ।

मिराबेल्लीले आर्थिक समस्या हुन सक्ने भएका कारण रोनाल्डोलाई अनुबन्ध गर्न नसकिएको स्वीकार गर्दै क्लबका जिम्मेवार व्यक्तिहरु जिम्मेवार नभइदिा रोनाल्डोले क्लबको प्रख्यात कालो र रातो सर्ट पहिरिन नपाएको बताएका छन् । उनले मिलानको जर्सीमा रोनाल्डो नहुनुमा मालिकलाई दोष दिए ।

‘हामीले जर्ज मेन्डेससँग कुरा गर्‍यौं । हामीलाई थाहा थियो । रियल र रोनाल्डोको साथ समस्या हुन सक्छ । तर, पनि हामीले मागअनुसार सबै प्रक्रिया पुरा गरिसकेका थियौं,’ मिराबेल्लीले एक अन्तर्वार्ताका क्रममा भने, ‘तर, क्लबका मालिकले नै रोनाल्डोसँगको सम्झौता टिकाउ नहुने भन्दै सम्झौता रोकिदिए । त्यसो नभएको भए वर्तमान मालिकका साथ सिआर सेभेन मिलानका खेलाडी हुने थिए ।’

त्यसपछि अर्काे समरमा अमेरिकी हेज कोषले एसी मिलानमा लगानी गर्दै लि योङहोङ एक वर्षमै क्लबबाट बाहिरिएका थिए । यस्तै मिराबेल्लीले क्लबले त्यसै बेला एन्टेनियो कोन्टेलाई प्रशिक्षकमा नियुक्त गर्ने योजना बनाइरहेको समेत खुलासा गरे । सोही समय कोन्टे इन्टर मिलानको प्रशिक्षक बनेका थिए ।