एजेन्सी – कोरोना महामारीको त्रासपछि इटालियन सिरी ‘ए’ को स्थगित खेलहरु आगमी जुन २० देखि पुनः सुचारु हुदैछ । इटालियन फुटबल फेडेरेसन (एफआइजीसी) ले सोमबार स्थगित सिरी ए २० जुनदेखि अगस्ट २ सम्म सकाउने खेल तालिका बनाएको छ । 

नयाँ तालिका अनुसार ६ सातामा सिरी ए क्लबले एक सातामा दुई खेल खेल्नुपर्ने भएको छ । कोरोनाको कारण सिरी ए गएको मार्च ९ देखि स्थगित हुदा अझै १२ चरणको खेल खेल्न बाँकी छ ।

खेलहरु शनिबार–सोमबार र मंगलबार–बिहीबार हुने छ । खेल स्थानिय समयअनुसार ६ः३० र ८ः४५ बजे तथा केही खेल छिट्टै ४ः१५ बजे हुनेछ । पहिलो दिन २५औं चरणका बाँकी रहेका चार मध्ये दुई खेल हुनेछ । टोरिनो र पर्माबीचको खेल बाट स्थगित सिरी ए पुनः सुचारु हुनेछ ।

सोही दिन हेला भेरोना र काग्लिएरीबीच खेल हुनेछ । अर्काे दिन एटलान्टा र ससुलो तथा एन्टर मिलान र साम्पडोरियाबीच खेल हुनेछ । २२ जुनदेखि सिरी ए को २६औं चरणको खेल हुरु हुनेछ ।

सिरी को शीर्षस्थानमा रहेको युभेन्टस बोलोग्नाको भ्रमणमा निस्कनेछ । दोस्रो स्थानमा रहेको लाजियोले अर्काे दिन एटलान्टा भ्रमण गर्नेछ । उपाधिको छिनोफानो हुने खेलको रुपमा हेरिएको युभेन्टस र लाजियोबीचको खेल २० जुलाईमा युभेन्टसको मैदानमा हुनेछ ।

युभेन्टस लगातार नवौं सिजन सिरी ए च्याम्पियन बन्ने दाँउमा हुनेछ । युभेन्टसको २६ खेलबाट ६३ अंक छ । समान खेलबाटै लाजियोको ६२ अंक छ । इन्टर मिलान (५४), एटलान्टा (४८) अंक रहँदा लिस, एसपाल र ब्रेसिया रेलिगेसन जोनमा रहेको छ ।

सिरी ए सुरु हुनुअघि कोपा इटालियाको सेमिफाइनलको दोस्रो लेग र फाइनल खेल हुने तय छ । सेमिफाइनल १३ जुनमा तथा फाइनल १७ जुनको लागि तय गरिएको छ । सेमिफाइनलको पहिलो लेगमा युभेन्टस र एसी मिलानले १–१ गोलको बराबरी खेल्दा नेपोलीले इन्टर मिलानलाई १–० ले पछि पारेको छ ।